Արդեն մեկ ամսից ավել է, ինչ բնապահպանական ակտիվիստները, հասարակական լայն շերտերը հանդես են գալիս ի պաշտպանություն Մաշտոցի այգու: Այգու կառուցապատման որոշումը` թեկուզ «ժամանակավոր», հակասում է ՀՀ կողմից վավերացված միջազգային կոնվենցիաների և բազմաթիվ ՀՀ օրենքների, որի մասին բազմիցս տեղեկացվել է համապատասխան պետական և տեղական ինքնակառավարման մարմիններին:

2012թ. մարտի 15-ին ՀՀ կառավարությունը, հերթական անգամ խախտելով օրենքները, ընդունել է այգու կառուցապատման «օրինականացման» որոշում:

Այս ընթացքում պետական որոշ մարմիններ` ի դեմս ՀՀ ոստիկանության, իրականացրել են մի քանի «օրինական» գործողություններ՝ ի պաշտպանություն կառուցապատման գործընթացի, որոնց թվում մարտի 14-ի երեկոյան իրականացված «Վրան» գործողությունը՝ գերազանցելով իրենց իրավունքները:

Պահանջում ենք` 

ՀՀ կառավարությունից, Երևանի քաղաքապետարանից.

- Որոշումներ ընդունել պահպանելով ՀՀ կողմից ընդունված միջազգային կոնվենցիաները և ՀՀ օրենքները, որի հենց առաջին իրականացնողն ու կատարաղը պիտի լինեն իրենք: 

- Վերանայել օրենքներին հակասող որոշումները, վերականգնել այգու նախնական վիճակը և միաժամանակ ծրագրեր իրականացնել Երևանի հանրային այլ կանաչ տարածքների վերականգման և հանրությանը վերադարձնելու համար, որոնք անխնամության և անբարեկարգության անվան տակ (հիշեցնենք, որ այգիների խնամքն ու պահպանությունը քաղաքապետարանի անմիջական պարտականությունն է բնակիչների վճարած հարկերի հաշվին, որոնք ունեն «մաքուր շրջակա միջավայրի և հանգստի իրավունք». ՀՀ Սահմանադրություն) տրվում են կառուցապատման կանաչ տարածքների «խնամքի» պատրվակով:

ՀՀ ոստիկանությանից` 

իրականացնել միայն իրենց գործառույթներից բխող գործողություններ: Չգերազանցել իրենց իրավասությունները: Հաշվի առնել հանության բազմաթիվ օրինական բողոքները: Ստացած անօրինական հրամանները բողոքարկել վերադաս կամ տեղական ինքնակառավարման մարմինների առջև, որի իրավունքը իրենք ունեն` թեկուզ կատարումից հետո, և բողոքարկումից հետո չկատարալ նմանատիպ անօրինական հրամանները, դրանով նրանք կվերականգնեն հանրության մոտ ամեն օր ընկնող իրենց վարկը: Լինել ՀՀ օրենքների կատարող, հասարակության և մարդու իրավունքնրի պաշտպան, որի համար իրենք գոյություն ունեն, այլ ոչ թե մի քանի անձանց, որոնք իրենց սկսել են նույնացնել պետության հետ:

Ակնկալում ենք ՀՀ կառավարությունից, ՀՀ ոստիկանությունից, Երևանի քաղաքապետարանից ՀՀ օրենքների կատարում:

Հայաստանի Կանաչների (սոցիալ-էկոլոգիական) կուսակցության
նախագահ Արմենակ Դովլաթյան

Լուս.` Ա. Դովլաթյանի ֆեյսբուքյան օգտատետրից