Տեսանյութեր
Լուսանկարներ
Տիգրան Ավինյան. «Այս փուլում մասնավոր ավիափոխադրողների քանակի ավելացման հարցն ենք քննարկում»
Պարետատունն անում է հնարավորինը, որպեսզի սեպտեմբերից սկսած հանրակթական դպրոցներն իրենց աշխատանքը հեռավար չիրականացնեն: Այս մասին խորհրդարանի հատուկ նիստում ասաց պարետ Տիգրան Ավինյանը:
Փոխվարչապետի խոսքով` ինչպես հանրակրթության, այնպես էլ մի քանի այլ ոլորտներում սահմանվում են կանոններ, որոնք հնարավորություն կտան աշխատանքները կազմակերպելու համար:
«Իմ քայլը» խմբակցության պատգամավոր Վիկտոր Ենգիբարյանը հետաքրքրվեց չվերթների կազմակերպման գործընթացից, թե արդյոք հնարավոր է չվերթների թիվն ավելացնել:
«Էս պահի դրությամբ քննարկվում է մասնավոր չվերթների քանակի ավելացման հարցը: Ինչ վերաբերում է ընդհանուր ավիափոխադրումների վերականգնմանը, կարծում եմ այն պայմանավորված կլինի արտակարգ դրության ռեժիմից դուրս գալու և համավարակի տարածման ինտենսիվության հետ: Այս փուլում մասնավոր ավիափոխադրողների քանակի ավելացման հարցն ենք քննարկում»,-ասաց Ավինյանը:
«Լուսավոր Հայաստան» խմբակցության պատգամավոր Արկադի Խաչատրյանն ասաց, որ լուրեր են շրջանառվում ՌԴ-ում այսօրվանից հանվող սահմանափակումների մասին: Պատգամավորը հետաքրքրվեց, թե հնարավոր է այդ պարագայում չվերթները վերականգնվեն:
Ավինյանն արձագանքեց, որ նման տեղեկատվության չի տիրապետում, հետևաբար նման հարցի կարելի է անդրադառնալ միայն որոշման կայացման դեպքում:
«Իմ քայլը» խմբակցության պատգամավոր Թագուհի Թովմասյանն էլ հետաքրքրվեց ինքնամեկուսացած և վարակված անձանց ընդունելության քննություններին չմասնակցելու հարցով: Ավինյանն արձագանքեց, որ կկազմակերպեն նման քննություններ, այժմ ճշտում են նման անձանց քանակը:
Մեկնաբանել