Հազարավոր բուլղարացի պահանջում են կառավարության հրաժարականը
Արդեն մի քանի օր է, ինչ Բուլղարիայում չեն դադարում հակակառավարական ցույցերը։ Հուլիսի 12-ին հազարավոր քաղաքացիներ դուրս են եկել մայրաքաղաք Սոֆիայի և երկրի մյուս քաղաքների, այդ թվում՝ Բուրգասի, Վառնայի և Պլովդիվի փողոցներ։ «Deutsche Welle»-ն գրում է, որ ցուցարարները վանկարկել են «մաֆիա» և «հրաժարական տուր» արտահայտությունները։
Զուգահեռաբար, խորհրդարանի ընդդիմադիր սոցիալիստական կուսակցությունը նախաձեռնել է վարչապետ Բոյկո Բորիսովին անվստահություն հայտնելու քվեարկություն։ Սպասվում է, որ այն տեղի կունենա հուլիսի 15-ին։ Բուլղարիայի սոցիալիստական կուսակցության առաջնորդ Կոռնելիա Նինովան Բորիսովին և նրա «Քաղաքացիները հանուն Բուլղարիայի եվրոպական զարգացման» կուսակցությանը մեղադրել է կառավարման «մաֆիոզ-օլիգարխիկ» ձևի մեջ։
Բողոքի ցույցերը սկսվել են հուլիսի 9-ին այն բանից հետո, երբ խուզարկություններ են տեղի ունեցել նախագահի աշխատակազմում, որոնք կապված չեն եղել կոռուպցիայի և պետական գաղտնիքի բացահայտման քրեական գործերի հետ։ Կոռուպցիայի դեմ պայքարի հարցերով լիազոր ներկայացուցիչը և նախագահի անվտանգության հարցերով խորհրդականը ձերբակալվել են հարցաքննության համար։
Նախագահ Ռումեն Ռադևը խուզարկությունների պատասխանատվությունը դրել է վարչապետի վրա և կոչ արել նախարարներին վայր դնել լիազորությունները՝ կառավարությանը համեմատելով մաֆիայի հետ։ Իր հերթին Բորիսովը հայտարարել է, որ բաց է երկխոսության համար և հարգում է յուրաքանչյուրի բողոքի իրավունքը։ Նա ցուցարարներին կոչ է արել «զգույշ լինել և թույլ չտալ խաղաղ ցույցերի ժամանակ արյուն թափվի»՝ նշելով, որ ատելության հռետորաբանությունը ոչ մի լավ բանի չի հանգեցնի։
Լուսանկարը՝ «AFP»-ի
Մեկնաբանել