Երեկ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում քննվում էր Նարեկ Հարթունյանի կողմից բերված երկու բողոքները:

Հիշեցնենք, որ բողոքներից  մեկը վերաբերում էր «Ջի Էյջ Սթորիջ Էնթերփրայզս»ՍՊԸ  ընկերության հաշիվների վրա դրած արգելանքներին: Նարեկ Հարթունյանը քննիչ  Ռաֆայել Մկրտչյանին ուղղված դիմումով պահանջել էր վերացնել դրված արգելանքները, ինչը  մերժվել է  քննիչի  որոշմամբ: Քննիչի  որոշման դեմ Հարթունյանը  բողոք էր ներկայացրել  ՀՀ գլխավոր դատախազին: Ներկայացված բողոքը մակագրվել էր դատախազ Բագրատ Պետրոսյանին, որի կողմից էլ մերժվել է ներկայացված բողոքը: 

Երկրորդ որոշումը, որը բողոքարկվել էր դատարան վերաբերում էր Սևակ Արզարունու, Արտյոմ Մարտիրոսյանի և  Արսեն Արտաշեսյանի նկատմամբ քրեական  հետապնդում չիրականացնելուն և  վերջիններիս նկատմամբ մեղադրանքներ չառաջադրելուն:

Նույն «ճակատագրին» էր արժանացել նաև այդ  բողոքը` մերժվել էր քննիչի որոշմամբ, իսկ ներկայացված  բողոքը մերժել էր դատախազ Բագրատ  Պետրոսյանը:

Վերը նշված  երկու որոշումների դեմ բերված բողոքները մակագրվել են Կենտրոն և Նորք-Մարաշ վարչական շրջանների  ընդանուր  իրավասության առաջին ատյանի դատարանի դատավոր Ռ.Ներսիսյանին:

Դատական նիստին դատարան չէր ներկայացել քննիչ Ռաֆայել Մկրտչյանը, ինչպես նաև դատարանին չէր ներկայացրել  նյութերը, ինչը պարտավոր  էր կատարել:

Պաշտպանական կողմը դատարանից խնդրեց թույլատրել տեսանկարահանում, ինչի դեմ առարկեց դատախազ Պետրոսյանը, այն պատճառով, որ դատական նիստը իրականացվում է դռնփակ: Դատախազը հայտնվեց մեղմ ասած «վատ» վիճակում, քանի որ դատավոր Ռ.Ներսիսիյանը ստիպված պարզաբանեց դատախազին, որ ՀՀ քրեական  դատավարության օրենսգրքի 290 հոդվածի կարգով բերված բողոքները քննվում են դռնբաց:

Դատախազին ուղղված դատավոր Ներսիսյանի այն հարցին, թե արդյոք էլի առարկում է տեսանկարահանմանը, դատախազը պատասխանեց «այո», իսկ թե ինչ պատճառաբանությամբ, չկարողացավ հիմնավորել:

Ինչևէ, դատախազը երևի հասկացավ, որ դուռը փակած դահլիճում դատական նիստը դռնփակ նիստ չէ, իսկ դատական նիստը հետաձգվեց, որպեսզի քննիչ  Ռ.Մկրտչյանը նյութերը ներկայացնի դատարան:

Հաջորդ դատական նիստերը նշանակվեցին ապրիլի 6-ին և 10-ին: 

Կարեն Կարապետյան

Լուսանկարում` Բագրատ Պետրոսյանը