Խորհրդարանում քննարկվում է ԿԲ խորհրդի անդամի թեկնածության հարցը
Խորհրդարանի արտահերթ նիստում քննարկվում է Կենտրոնական բանկի (ԿԲ) խորհրդի անդամի թափուր պաշտոնում թեկնածուի առաջադրման հարցը: «Իմ քայլը» խմբակցությունը առաջադրել է Հովհաննես Խաչատրյանի թեկնածությունը, որի կենսագրությունը ներկայացրեց Ֆինանսավարկային և բյուջետային հարցերի մշտական հանձնաժողովի փոխնախագահ Արտակ Մանուկյանը:
Նրա խոսքով` թեկնածուն 2002-2008 թվականներին աշխատել է ԿԲ-ում, ունի տնտեսագիտության մագիստրոսի կոչում, 2008-ից մինչ օրս աշխատում է Ամերիա բանկում: Ունի ֆինանսական վերլուծաբանի միջազգային կոչում, դասավանդում է Ամերիկյան համալսարանում:
Հովհաննես Խաչատրյանը շնորհակալություն հայտնեց «Իմ քայլը» խմբակցությանն իր թեկնածությունն առաջադրելու համար, ապա հավելեց, որ հանդիպումներ ու ջերմ քննարկումներ է ունեցել բոլոր խմբակցությունների հետ:
ԱԺ տնտեսական հարցերի մշտական հանձնաժողովի նախագահ Բաբկեն Թունյանը, դիմելով ԿԲ խորհրդի թեկնածուին, ասաց, որ վերջինս աշխատում է խոշոր առևտրային բանկերից մեկում և հետաքրքրվեց, թե այս իրավիճակին առնչվող ինչ վիճակագրություն կարող է ներկայացնել տնտեսվարողների ֆինանսական դժվարությունների մասին: Հովհաննես Խաչատրյանն արձագանքեց, որ տնտեսվարողների գրեթե մեկ երրորդը օգտվել է վարկային արձակուրդներից, սակայն ինչպես նկատելի է, այդ ժամանակը բավարար չէր, քանի որ արտակարգ դրությունը դեռ չի ավարտվել, և բիզնեսի որոշ տեսակներ չեն գործում:
«Իմ տպավորությամբ բիզնեսները երկարաժամկետ առումով խնդիրներ չեն տեսնում: Որոշ բիզնեսներ առիթից օգտվելով ներդրումներ են անում հիմնական միջոցների մեջ, կա վստահություն երկրի ու տնտեսության նկատմամբ, բայց ընթացիկ անորոշությունն ինչքան ժամանակը ձգվի էդքան, խնդիր է դառնալու: Եւս մի քանի ամիս ու հնարավոր է` տուժած բիզնեսների մի քանի տասնյակ որոշի դուրս գալ բիզնեսից, վաճառել գույքերը: Էս պահին դեռ ավարտված չէ խնդիրների առաջին ցիկլը»,- ասաց նա:
Մեկնաբանել