Կոտայքի մարզի Մարմարիկ գյուղի միջնակարգ դպրոցի ուսուցչուհիներից մեկի (չցանկացավ ներկայանալ) փոխանցմամբ՝ 2012 թ. հունվար ամսից ուսուցիչների աշխատավարձը կրճատել են 6%-ով, և դպրոցի կառավարման նիստում ընդունված այդ որոշումը բեկման ենթակա չէ: «Հայացք»-ի հետ զրույցում Մարմարիկ համայնքի միջնակարգ դպրոցի նորանշանակ տնօրեն Նորիկ Սիմոնյանը չհերքեց աշխատավարձերի կրճատման փաստը:

- Դպրոցը ֆինանսավորվում է աշակերտների թվով, յուրաքանչյուր աշակերտի համար նախատեսվող գումարի չափը կազմում է 120 հազար դրամ: Այս տարվա ֆինանսավորումից պարզ դարձավ, որ 1-4-րդ դասարանների յուրաքանչյուր աշակերտի համար նախատեսված 120000 դրամի փոխարեն սահմանվել է 90000 դրամ,- ասաց տնօրենը:

Տնօրենի փոխանցմամբ ուսուցիչներին ներկայացված` աշխատավարձի կրճատման հարկադրված իրավիճակը չի բողոքարկվել, իսկ համաձայնագրերը ստորագրվել են այն հույսով, որ այս տարվա աշնանը աշխատավարձերի չափը կվերականգնվի:

- Դա ժամանակավոր բնույթ է կրում, և աշնանը ուսուցիչները փոխհատուցում կստանան: Եթե շարունակեինք աշխատավարձը բաշխել նախկին չափով, ապա արձակուրդայինի համար գումար չէինք ունենա: Եվ հետո, երբ մեր շրջան այցելած ՀՀ վարչապետին դիմեցինք այդ հարցով, նա ևս հուսադրեց, որ կրճատված աշխատավարձը ժամանակավոր բնույթ է կրում:

Պարզ է, որ ուսուցչի աշխատավարձը պահելու համար մարզային դպրոցն «ինքնագլուխ» որոշումներ չէր կայացնի: Ուստի որոշեցինք դիմել ՀՀ կրթության և գիտության նախարարությանը, որտեղից մեզ պատասխանեցին, որ «ոչ առևտրային կազմակերպություններն (այդ թվում և դպրոցները.- հեղ.) իրենց միջոցների հաշվին ծախսեր պետք է կատարեն լիազորված պետական մարմինների կողմից հաստատված ծախսերի նախահաշիվներին (հաստիքային ցուցակ) համապատասխան, իսկ այդ վճարների չափերն իրավասու է որոշել պետական ոչ առևտրային կազմակերպությունը` այն համաձայնեցնելով լիազորված պետական մարմնի հետ»:

Յուրաքանչյուր ուսուցչի աշխատավարձից կրճատված գումարի չափը կազմում է 4000-5000 դրամ, ինչը, Մարմարիկի միջնակարգ դպրոցի 26  տարվա մանկավարժական ստաժ ունեցող տնօրենի կարծիքով, քիչ գումար չէ: Նրա փոխանցմամբ Հրազդան քաղաքի և նրա թաղամաս-համայնքների բոլոր դպրոցներում նույն վիճակն է. 2011 թ. ուսումնական տարվանից ուսուցիչները չեն վճարվում ո՛չ դասղեկության, ո՛չ էլ արտադասարանական պարապմունքների համար, չեն վճարվել նաև մեթոդմիավորման նախագահները:

ԱՆՈՒՇ ՆԵՐՍԻՍՅԱՆ