«Հայկական ժամանակի» տեղեկություններով' Հայաստանի դատախազության համակարգում երկու շաբաթ է, փորձում են ընտրել այն հինգ դատախազներին, որոնք կոռուպցիայի դեմ պայքարի շրջանակներում պետք է «զոհաբերվեն» և պաշտոնանկ արվեն:

Ըստ դատախազությունում «Հայկական ժամանակի» աղբյուրների' որպես քավության նոխազի առաջին պոտենցիալ թեկնածու նշվում է Սիսիանի դատախազ Հայկ Կարապետյանի անունը: Ենթադրվում է, որ նրան հեշտ կլինի զոհաբերել, քանի որ այն հատուկենտ դատախազներից է, որոնք դատախազությունում և գործադիր իշխանությունում կապեր չունեն, և նրանց պաշտոնանկությունը շղթայական ռեակցիա չի առաջացնի, նրանց համար ոչ ոք «կռիվ» չի տա:

Մյուս կողմից, ՀՀ կրթության պետական տեսչությունը մոտ տասն օր առաջ, անանուն ահազանգի հիման վրա, ուսումնասիրել է Կարապետյանի կնոջ'Նաիրա Ներսիսյանի ղեկավարած Սիսիանի ավագ դպրոցի փաստաթղթերը: «Հայկական ժամանակի» թղթակցի հետ զրույցում Ներսիսյանը հաստատել է կրթության տեսչության կողմից իրենց դպրոցում ուսումնասիրություններ իրականացվելու հանգամանքը' նշելով, որ արդյունքում ոչ մի խախտում չի հայտնաբերվել: