Ռուսաստանի Դաշնության կառավարությունը հավելյալ 15 միլիարդ ռուբլի կհատկացնի՝ ներգնա տուրիզմից օգտվող քաղաքացիների ծախսերը մասնակի փոխհատուցելու համար։ Այդ մասին Պետդումայում հայտարարել է ՌԴ վարչապետ Միխայիլ Միշուստինը։ 

Կախված շրջագայության տեսակից և ուղղությունից՝ զբոսաշրջիկները կստանան 5 000-15 000 ռուբլի։ Թե երբ կսկսի գործել օգնության ծրագիրը, Միշուստինը չի հստակեցրել, սակայն Ռոստուրիզմը հայտարարել է, որ գումարի փոխհատուցումը կգործի այն ժամանակ, երբ զբոսաշրջիկները օգոստոսի 15-ից դեկտեմբերի 20-ն ընկած ժամանակահատվածում այցելեն գործակալության նշած վարչական միավորներից մեկը՝ ընդ որում վճարումը կատարելով բացառապես Мир վճարային քարտով։ Շրջագայությունը պետք է ձգվի առնվազն 5 օր։

Ռուսաստանը մարտից փակել է կանոնավոր և չարթերային ավիահաղորդակցությունն այլ երկրների հետ։ Դա է պատճառը, որ ռուս զբոսաշրջիկները չեն կարող հանգստանալ արտասահմանում։

Ռոստուրիզմի տվյալներով՝ ռուսական զբոսաշրջային բիզնեսը, կորոնավիրուսի պատճառով, կորցրել է մոտ 1,5 տրիլիոն ռուբլի։

Լուսանկարը՝ Kirill Zykov / Moskva News Agency