Ըստ Գյումրիի Մանկավարժական ինստիտուտի պատմության ամբիոնի դասախոս, քաղաքագետ Գագիկ Համբարյանի` առաջիկա խորհրդարանական ընտրություններում պատգամավորական տեղերի համար ծավալվող ընտրապայքարում առաջին երեք տեղերը Շիրակի մարզում կձեւավորվեն հետեւյալ կերպ. առաջին տեղում, այսինքն` ձայների մեծամասնությունը կստանա ԲՀԿ-ն, այնուհետեւ ՀՀԿ-ն, իսկ 3-րդ տեղում կլինի Հայ ազգային կոնգրեսը: Մարզի գյուղերում ՀԱԿ-ն այդքան էլ հզոր դիրքեր չունի, եւ հիմնական պայքարը կծավալվի Գյումրին ընդգրկող 3 ընտրատարածքներում: 

Ամենաթեժ պայքարը կծավալվի երկու իշխող կուսակցությունների միջեւ: Գագիկ Համբարյանն այս պայքարում կարեւորում է նաեւ ՀՀԿ-ից եւ ԲՀԿ-ից մեծամասնականով հանդես եկող պատգամավորների ներուժը: Նրա կարծիքով, այս պահին գյումրեցիների կողմից ընդունված ու հարգված ՀՀԿ-ական Սուքիաս Ավետիսյանին ծնունդով երեւանցի, գործարար Արման Սահակյանով փոխարինելը ռիսկային էր ու նույն ընտրատարածքում ԲՀԿ-ական Մարտուն Գրիգորյանի հետ ընտրապայքարի մեջ մտնելով` նա ստիպված կլինի բավականին խոչընդոտներ հաղթահարել:

«Իհարկե, կանխատեսումներ անելն անշնորհակալ գործ է, -ասում է Գագիկ Համբարյանը,-բայց այս դեպքում ես հաշվի եմ առնում մեր քաղաքացիների յուրօրինակ մտածելակերպը: Գյումրեցիները շատ վատ են ճանաչում երեւանցի թեկնածուին, հիմնականում նրա անունը կապվում է «Շիրակ» ֆուտբոլային թիմի հետ: Այն, որ նա ֆուտբոլային թիմն է գնել, ընդամենը բիզնես ծրագիր է, վաղը նա այդ թիմը կարող է թանկ վաճառել մեկ ուրիշին ու հեռանալ: Պահպանողական գյումրեցիներին դժվար կլինի համոզել, որ նա գալիս է փոխելու իրենց կյանքը: Եվ հետո, գյումրեցիների մոտ կա ընդունված մի մտածելակերպ, թե` «թող վատն էղնի, բայց իմս էղնի», նկատի ունեմ, որ երկու թեկնածուների առումով գերադասելու են տեղացի պատգամավորին, ում հետ շփումն ավելի սերտ է, ով լավ-վատ այս տարիներին խորհրդարանում հարցեր է բարձրացրել, ով լավատեղյակ է քաղաքի խնդիրներին»:

ՕԵԿ կուսակցության վարկանիշը մարզում եւ հատկապես Գյումրիում սահուն կերպով իր առաջատար դիրքերը զիջեց անցած նախագահական ընտրություններից հետո: ՕԵԿ առաջնորդ Արթուր Բաղադասարյանի վարքագիծը ստիպեց մարդկանց հիասթափվել ոչ միայն անձից, այլեւ կուսակցությունից: Սակայն, չնայած այս ամենին, Գագիկ Համբարյանը 5 բալանոց սանդղակում ՕԵԿ-ին կշնորհեր 4-րդ տեղը: «ՕԵԿ-ը ձայներ կտանի Շիրակի մարզից, ու դա չի լինի շնորհիվ կուսակցության, դա կլինի, կարծում եմ, շնորհիվ այդ կուսակցության ներկայացուցիչ Հովհաննես Մարգարյանի, ով մարզից ընտրված մյուս պատգամավորների համեմատ ավելի ակտիվ գործունեություն է ծավալում խորհրդարանում»,-նկատում է քաղաքագետը:

Շիրակի մարզում առաջիկա ընտրությունների հետ կապված գործընթացները վերլուծելիս պետք է հաշվի առնել նաեւ առկա ադմինիստրատիվ ռեսուրսը: «Շիրակի մարզպետը, լինելով անկուսակցական, աշխատելու է ՀՀԿ կուսակցության համար,-ասում է Գագիկ Համբարյանը,- ունենք Գյումրիի քաղաքապետ, ով այդ կուսակցության ներկայացուցիչ է: Արդեն պարզ է, թե հիմնականում ադմինիստրատիվ ռեսուրսը մեր մարզում իր ուժերը որ ուղղությամբ է կենտրոնացնելու: Այդ ամբողջ համակարգն աշխատելու է, որպեսզի ձայներ ապահովի իշխող կուսակցության համար»:

Ըստ Գագիկ Համբարյանի` Հայ հեղափոխական դաշնակցությունը ձայներ կտանի շնորհիվ կուսակցության մարդկանց շրջանում ունեցած վարկանիշի: «Անհատներն այս առումով դերակատարում չեն ունենա»,-հավելում է քաղաքագետը:

Ամեն դեպքում, այն, ինչ այսօր ընդամենը կանխատեսումների մակարդակով է, կորոշակիանա բուն ընտրապայքարի ժամանակ: Թեեւ չի բացառվում, որ հետագայում, ինչպես լինում է շախմատային պարտիայում, լինեն եւ անսպասելի ուժեղ քայլեր, եւ չսպասված շախ ու մատեր: