![](/static/articles/01/20/26/l-qRMUUhgQoR.jpg)
Լարիսա Ալավերդյանն ու Կարինե Հակոբյանը հրաժարվե՞լ են ընտրապայքարից, որովհետեւ…
«Ժառանգություն» կուսակցության քարտուղար Կարինե Հակոբյանը «Հետքի» հետ զրույցում ասաց, որ առայժմ հրաժարվել է կուսակցության համամասնական ցուցակում առաջադրվելուց, ինչպես նաեւ մեծամասնական ընտրապայքարից, սակայն դեռ չի որոշել «Ժառանգություն» կուսակցությունից դուրս կգա, թե ոչ: Կարինե Հակոբյանն այս թեմայով վաղը մամուլի ասուլիս է հրավիրելու:
«Այս երկու տարիների ընթացքում կուսակցության ներսում տարբեր հարցերի վերաբերյալ տարաձայնություններ ունեցել եմ, միշտ եղել եմ փոքրամասնության մեջ: Շատ հարցերում մենք տարբեր կարծիքներ ենք ունեցել, տարբեր է եղել իմ տեսանկյունը: Այս վերջին իրադարձությունները բարակած թելը կտրեցին, վերջին կաթիլը կարծես լցվեց այս նախընտրական պայքարի շեմին»,-ասում է Կարինե Հակոբյանը:
Նշենք, որ այսօր «Ժառանգություն» կուսակցությունը խորհրդի նիստով վերջնականապես որոշեց ոչ միայն «Ազատ դեմոկրատներ» կուսակցության հետ դաշինք կազմելու հարցը, այլեւ հստակեցրեց համամասնական և մեծամասնական ցուցակները:
Կարինե Հակոբյանն ասաց, որ չի ընդունում կադրային այն քաղաքականությունը, որն այսօր Հայաստանում տեղի է ունենում: «Պայքարել եմ, պայքարում եմ եւ շարունակելու եմ պայքարել այս ամենի դեմ, եւ իմ հրաժարվելը ընտրապայքարից եւս պայքարի մի դրսեւորում է, որովհետեւ անընդունելի է այն, ինչ տեղի է ունենում մեր քաղաքական դաշտում»,-ավելացրեց Կարինե Հակոբյանը:
Նիստի սկզբում «Ժառանգություն» խմբակցության պատգամավոր Լարիսա Ալավերդյանը եւս հրաժարվել է ընտրապայքարից, սակայն հետո համաձայնվել է ընդգրկվել ցուցակում եւ զբաղեցնել 41-րդ տեղը:
Մեկնաբանություններ (4)
Մեկնաբանել