Վերաքննիչ քրեական դատարանը՝ նախագահությամբ դատավոր Ռուզաննա Բարսեղյանի, քիչ առաջ մերժեց սնանկության դատարանի դատավոր Գևորգ Նարինյանին կալանավորելու որոշման դեմ նրա պաշտպանների բողոքը: Նիստը դռնփակ էր, որոշման մասին «Հետքի» հետ զրույցում ասաց Նարինյանի պաշտպան Վարազդատ Բադալյանը:

Հիշեցնենք, որ սնանկության դատարանի դատավոր Գևորգ Նարինյանը մեղադրվում է պաշտոնեական լիազորությունները չարաշահելուն օժանդակելու, փողերի լվացման, ապօրինի հարստանալու և հայտարարագրում կեղծ տվյալներ ներկայացնելու կամ հայտարարագրման ենթակա տվյալները թաքցնելու հոդվածներով։ Նույն գործով անցնում է նաև դատավոր Արա Կուբանյանը։ Վերջինս մեղադրվում է պաշտոնեական լիազորությունները չարաշահելու մեջ։ Գևորգ Նարինյանը հուլիսի 20-ին կալանավորվել է Երևանի ընդհանուր իրավասության դատարանի դատավոր Մնացական Մարտիրոսյանի որոշմամբ, որի դեմ պաշտպանները բողոք էին նորկայացրել: Բողոքի վերաբերյալ որոշում կայացնելու համար դատավոր Ռուզաննա Բարսեղյանը խորհրդակցական սենյակ էր հեռացել օգոստոսի 7-ին: