HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գայանե Հովսեփյան

23-րդ միջոցառմամբ կառավարությունը կաջակցի զբոսաշրջության ոլորտին

Կառավարությունն այսօրվա՝ օգոստոսի 13-ի նիստում հաստատեց կորոնավիրուսի տնտեսական հետևանքների չեզոքացման 23-րդ միջոցառումը, որի նպատակն է օժանդակել կորոնավիրուսի տարածման հետևանքով զբոսաշրջությանն ուղղակիորեն առնչվող առանձին ոլորտներում տնտեսավարողների համար առաջացած դժվարությունների հետևանքով ստեղծված իրավիճակում գործունեության շարունակականությանը և աշխատատեղերի պահպանմանը:

Միջոցառման շահառու հանդիսանում են Հայաստանի տարածքում պետական գրանցում ստացած՝ միկրոձեռնարկատիրության սուբյեկտ չհանդիսացող այն իրավաբանական անձինք կամ հաշվառված անհատ ձեռնարկատերերը, որոնք ստեղծվել են մինչև 2020 թվականի մարտի 31-ը և համապատասխանում են ստորև թվարկված բոլոր չափանիշներին:

2020 թվականի առաջին եռամսյակի կամ այդ եռամսյակում ընդգրկված որևէ ամսվա համար ներկայացված ԱԱՀ-ի և ակցիզային հարկի միասնական հաշվարկի և/կամ շրջանառության հարկի հարկային հաշվարկով տնտեսավարողի գործունեության առնվազն 50 տոկոսը վերաբերել է ստորև թվարկված ոլորտներին՝

  • Կացության կազմակերպում,
  • Հանրային սննդի կազմակերպում,
  • Զբոսաշրջային գործակալությունների և օպերատորների գործունեություն, տեղերի ամրագրում և զբոսաշրջային ոլորտի այլ ծառայություններ,
  • Առողջության վերականգնման կարիք ունեցող անձանց սոցիալական սպասարկում կացության ապահովմամբ, 
  • Ընդ որում, վերը նշված ոլորտների դասակարգիչները չհայտարարագրած, սակայն 2020 թվականի 1-ին եռամսյակի ընթացքում փաստացի նշված ոլորտներում գործունեություն իրականացրած տնտեսավարող սուբյեկտները կարող են ընդգրկվել միջոցառման շահառուների ցանկում՝ հարկային մարմնի տեղեկատվական բազայում արտացոլված տվյալների ուսումնասիրության արդյունքում։ Տվյալ դեպքում՝ տնտեսավարող սուբյեկտը գրավոր դիմում է ներկայացնում հարկային մարմին և ուսումնասիրության արդյունքներով շահառու համարվելու դեպքում՝ ընդգրկվում է շահառուների ցանկում դիմելու օրվա ամսվանից սկսած։  

Ըստ էկոնոմիկայի նախարարին՝ աջակցությունից կօգտվեն այն կազմակերպությունները, որոնք ունեն առնվազն 3 աշխատակից, և ստեղծվել են ոչ ուշ, քան 2020 թվականի մարտի 31-ը։

Միջոցառման շրջանակում շահառու հանդիսանալու ժամանակահատվածը ներառում է 2020 թվականի հուլիսից մինչև 2021 թվականի մարտ ամիսը ներառյալ։ Դրամաշնորհները տրվում են յուրաքանչյուր ամսվա համար։ 

Աջակցության եղանակը յուրաքանչյուր երրորդ կամ չորրորդ աշխատակցի աշխատավարձի սուբսիդավորումն է միջոցառման շրջանակներում, որը նշանակում է ամբողջ աշխատավարձի ֆոնդի 33 կամ 25 % հատուցում։ Ավելի մեծ չափով աջակցություն կստանան այն կազմակերպությունները, որոնք, չնայած եկամուտների կրճատմամբ պայմանավորված դժվարություններին, աջակցության ամսվա ընթացքում նախորդ տարվա նույն ամսվա համեմատությամբ պահպանած են եղել իրենց աշխատակիցների և աշխատատեղերի ոչ պակաս, քան 70 %-ը։ 

Աջակցություն չի տրամադրվի այն կազմակերպություններին, որոնք 2019 թվականին կառավարության որոշման արդյունքում ավելացված արժեքի հարկի 50 մլն դրամը գերազանցող գերավճարների վերադարձ են ունեցել և հակառակ դրան՝ կրճատել են աշխատակազմի կեսից ավելին։

«Եթե կազմակերպությունը կատարել է հսկիչ դրամարկղային մեքենաների շահագործման կանոնների խախտում  և արձանագրող ակտը դարձել է անբողոքարկելի, ապա այդ ամսվանից և հետագա ամիսմերի համար կազմակերպությունը կդադարի օգտվել աջակցությունից»,- նշեց էկոնոմիկայի նախարարը։

Վարչապետը հետաքրքրվեց՝ արդյոք ՀԴՄ-ների վերաբերյալ ակտի անբողոքարկելի լինելը նշանակու՞մ է դատական ատյաններով անցած։ Էկոնոմիկայի նախարար Տիգրան Խաչատրյանն էլ հայտնեց, որ պետական եկամուտների կոմիտեի հետ քննարկման ժամանակ եկել են այն եզրակացության, որ ակտը պետք  է վերջնականապես ուժի մեջ մտնի, որպեսզի համարվի արձանագրված խախտման վերջնական եզրակացություն։ Վարչապետին անհանգստացրեց այն փաստը, որ հնարավոր է՝ այդ դատական պրոցեսը տևի երկու տարի։

Ի վերջո կառավարությունը որոշեց, որ կշարունակի աջակցել նույնիսկ այն դեպքում, երբ խախտումն արձանագրվում է, բայց այն պահին, երբ ՀԴՄ-ի խախտումը դառնում է անբողոքարկելի, կառավարությունը հետ կբռնագանձի աջակցությամբ տրամադրված ամբողջ գումարը։

Մեկնաբանություններ (1)

Իննա
Զբոսավարները հանդիսանու՞մ են 23-րդ ծրագրի շահառու

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter