ԱՄՆ պետքարտուղար Մայք Պոմպեոն և Լեհաստանի ազգային պաշտպանության նախարար Մարիուշ Բլաշակը օգոստոսի 15-ին Վարշավայում ստորագրել են ռոտացիոն հիմունքներով Լեհաստանում ամերիկյան 1000 զինծառայողների տեղակայման մասին համաձայնագիրը։ Այդ մասին գրում է «Deutsche Welle»-ն։ Նման քայլը «ուժեղացնում է այն երաշխիքը, որ մեր զինծառայողները, ԱՄՆ-ի և Լեհաստանի նկատմամբ սպառնալիքի դեպքում, կկանգնեն մեջք մեջքի»,- ստորագրման պահին հայտարարել է Լեհաստանի նախագահ Անջեյ Դուդան։

Փաստաթղթով նախատեսվում է ԱՄՆ Կենտուկի նահանգի Ֆորտ Նոքս ռազմաբազայից հինգերորդ բանակային կորպուսի մի քանի զորամասերի տեղափոխումը Լեհաստան։ Ներկայումս Լեհաստանում գտնվում են մոտ 4 500 ամերիկացի զինծառայողներ և սպաներ։

Ավելի վաղ ԱՄՆ նախագահ Դոնալդ Թրամփը հաստատել էր Գերմանիայում ամերիկացի զինծառայողների թվաքանակի կրճատման մասին լուրը։ Սպիտակ տան ղեկավարը հայտարարել էր, որ որոշումը պայմանավորված է նրանով, որ պաշտոնական Բեռլինը չի կատարել ՆԱՏՕ-ի ֆինանսավորման իր պարտականությունները։ ԱՄՆ պաշտպանության նախարար Մարկ Էսթերը հայտարարել է, որ Պենտագոնը Գերմանիայից կհանի 11 900 զինծառայողների, որոնցից 5600-ը կտեղափոխվեն Հյուսիսատլանտյան դաշինքի անդամ այլ երկրներ, իսկ 6400-ը կվերադառնան Միացյալ Նահանգներ, սակայն ռոտացիոն սկզբունքով  ավելի ուշ կգործուղվեն եվրոպական երկրներ։

Լուսանկարը՝ Լեհաստանի պաշտպանության նախարարության կայք էջի