Այսօր՝ առավոտյան ժամը 9:30-ին,  հրդեհ է բռնկվել Ալավերդու քաղաքապետարանի  թիվ 6 մանկապարտեզում: Մանկապարտեզը գտնվում է Ալավերդու Ս. Սարահարթ թաղամասի 2 զանգվածում: Մանկապարտեզի  չօգտագործվող մասնաշենքի տանիքից սկսված հրդեհը մանկապարտեզի աշխատողները նկատելուն պես անմիջապես  զանգահարել են Ալավերդու հրշեջ ծառայություն, որը հրդեհի վայր է ժամանել մոտ 40 րոպե հետ:  Մինչ այդ մանկապարտեզից հանվել են բոլոր երեխաները: 

Ընդամենը 5 րոպե հրդեհամարման աշխատանքներ կատարելուց հետո Ալավերդու հրշեջ ծառայության  հրշեջ ավտոմեքենայի ջուրը վերջացավ: Իսկ հրդեհը  շատ արագորեն տարածվեց դեպի մանկապարտեզի օգտագործվող մասնաշենքի  դահլիճի  տանիքը:  Հրդեհից 1 ժամ հետո հրդեհի վայր ժամանած  Օձունի հրշեջներին  հաջողվեց կանխել  հրդեհի տարածումը:

Սակայն  հրդեհամարման աշխատանքները այստեղ  այս պահին դեռևս շարունակվում են: Այս պահին  հրդեհի վայրում է գտնվում նաև Վանաձորի հրշեջ ծառայությունը: