![](/static/articles/12/06/99/l-pWPBOefteY.jpg)
Եվրամիությունը չի ճանաչում Բելառուսի նախագահական ընտրությունների արդյունքները
ԵՄ անդամ երկրների ղեկավարները և կառավարությունները չեն ճանաչում Բելառուսի նախագահական ընտրությունների արդյունքները։ Այդ մասին օգոստոսի 19-ին Բրյուսելում արտահերթ գագաթնաժողովից հետո հայտարարել է Գերմանիայի կանցլեր Անգելա Մերկելը։ Նրա խոսքերով՝ քվեարկությունը չի եղել ազատ և արդար, այդ իսկ պատճառով չի կարող ճանաչվել և ընդունվել Եվրամիության կողմից։
Մերկելը նաև հայտարարել է, որ չկա որևէ կասկած ընտրությունների ժամանակ զանգվածային խախտումների վերաբերյալ։ «Մենք քննադատում ենք մարդկանց նկատմամբ դաժան բռնությունը»,- հավելել է նա։ Կանցլերն ընդգծել է, որ բոլոր քաղբանտարկյալները պետք է անմիջապես ազատ արձակվեն։ Բացի այդ, անհրաժեշտ է համազգային երկխոսություն, որը պահանջում է ընդդմիությունը։ Մերկելն ընդգծել է, որ ԵՄ-ն կանգնած է խաղաղ ցուցարարների կողքին։
Եվրախորհրդի ղեկավար Շարլ Միշելը ևս ընդգծել է, որ ընտրությունների արդյունքները չեն ճանաչվում և ընդունվում։ Բացի այդ, ԵՄ-ն սանկցիաներ կկիրառի մի շարք անձանց նկատմամբ, որոնք պատասխանատվություն են կրում Բելառուսում բռնության կիրառման և ընտրությունների կեղծման համար։ Միշելը Մինսկին կոչ է արել գտնել ճգնաժամից դուրս գալու խաղաղ ելք։
Զուգահեռաբար, Եվրոպական հանձնաժողովի ղեկավար Ուրսուլա ֆոն դեր Լյայենը հայտարարել է, որ «Բրյուսելը պատրաստ է ուղեկցել Բելառուսում խաղաղ դեմոկրատական ճանապարհով իշխանության փոխանցումը»։ Նա նշել է, որ Հանձնաժողովն աջակցում է Բելառուսի ժողովրդին, որը ցանկանում է արմատական ազատություն և ժողովրդավարություն։ Եվրոպական հանձնաժողովը Բելառուսի ժողովրդին աջակցելու նպատակով 53 միլիոն եվրո կհատկացնի։ Դրանցից 3 միլիոնը կհատկացվի բռնաճնշումների զոհերին և քաղաքացիական հասարակությանը։ Բացի այդ, տրվելիք գումարի մի մասը կհատկացվի կորոնավիրուսի համավարակի հետևանքների դեմ պայքարին։
Գագաթնաժողովին մասնակցելու համար, որն անց էր կացվում տեսակոնֆերանսի ձեւաչափով, ԵՄ անդամ երկրների բազմաթիվ առաջնորդներ և կառավարությունների ղեկավարներ ընդհատել են իրենց ամառային հանգիստը։ Ավելի վաղ, Բելառուսի ընդդիմության թեկնածու Սվետլանա Տիխանովսկայան Եվրախորհրդին կոչ էր արել չճանաչել Բելառուսի նախագահական ընտրությունների պաշտոնական արդյունքները։
Արդեն 10-րդ օրն է Բելառուսում շարունակվում են բողոքի ցույցերը, որոնց մասնակիցները չեն ընդունում նախագահական ընտրությունների արդյունքները։ Ըստ Բելառուսի ԿԸՀ տվյալների՝ ձայների 80 %-ով հաղթել է Ալեքսանդր Լուկաշենկոն, որն արդեն 26 տարի ղեկավարում է Բելառուսը։ Ըստ պաշտոնական տվյալների՝ առաջին օրերին ձերբակալվել է գրեթե 7000 մարդ, մահացել երեք ցուցարար։ Ընտրություններից անմիջապես հետո Բելառուսում փաստացի արգելափակվել է համացանցը, ուժայինները բիրտ ուժ են կիրառել ցուցարարների նկատմամբ։
Լուսանկարը՝ «Reuters» գործակալության
Մեկնաբանել