Բելառուսի նախագահ Ալեքսանդր Լուկաշենկոն հանձնարարել է Ներքին գործերի նախարարությանը երկրում թույլ չտալ որևէ անկարգություններ։ Այդպիսի հանձնարարական հանրապետության նախագահը տվել է Անվտանգության խորհրդի նիստի ընթացքում։ «БелТа» պարբերականը գրում է, որ Լուկաշենկոն երկրում կայունության ապահովման համար հանձնարարականներ է տվել ևս չորս գերատեսչությունների և կառավարությանը։

«Մինսկում այլևս չպետք է լինեն որևէ անկարգություններ։ Մարդիկ հոգնել են, մարդիկ խաղաղություն և լռություն են պահանջում»,- նշել է Լուկաշենկոն։ Նրա խոսքերով՝ Բելառուսի բնակչության ճնշող մասը «սովոր են ապրել հանգիստ երկրում, իսկ նախորդ շաբաթ հասկացել են, որ կարող են դա կորցնել։ Մենք պետք է նրանց վերադարձնենք այդ հանգիստ երկիրը»,- հայտարարել է Լուկաշենկոն։

Լուկաշենկոն պետական սահմանային կոմիտեին հանձնարարել է ուժեղացնել պետական սահմանների հսկողությունը, որպեսզի «թույլ չտրվի օտարեկրացի զինյալների, զենքի, զինամթերքի ներկրումն ու անկարգությունների ֆինանսավորումը»։ Նա վստահ է, որ դեպի Բելառուս առկա է նման փողերի ներհոսք։ Իսկ արդեն պետական անվտանգության կոմիտեին Լուկաշենկոն հանձնարարել է կանխարգելել անկարգությունների կազմակերպիչների գործողությունները և բացահայտել դրանց ֆինանսավորման աղբյուրները։ Արտաքին գործերի նախարարությանն էլ նա հանձնարարել է արևմտյան երկրների առաջնորդներին ներկայացնել ցույցերի վերաբերյալ Բելառուսի պաշտոնական տեսակետը, այդ թվում Անգելա Մերկելին և Էմանուել Մակրոնին։

Լուկաշենկոյի հանձնարարականով պաշտպանության նախարարությունը պետք է հետևի Լեհաստանի և Լիտվայի տարածքներում ՆԱՏՕ-ի զորքերի տեղաշարժին։ Նրա խոսքերով՝ հատկապես պետք է ուշադիր լինել Գրոդնոյի ուղղությամբ, քանի որ արտաքին ուժերը առավել միտված են այնտեղ իրավիճակի լարմանը, քան Մինսկում։ Կառավարությունն էլ պետք է հետևի ձեռնարկությունների անխափան աշխատանքին՝ աջակցելով ձեռնարկությունների ղեկավարությանը։

Արդեն 10-րդ օրն է Բելառուսում շարունակվում են բողոքի ցույցերը, որոնց մասնակիցները չեն ընդունում նախագահական ընտրությունների արդյունքները։ Ըստ Բելառուսի ԿԸՀ տվյալների՝ ձայների 80 %-ով հաղթել է Ալեքսանդր Լուկաշենկոն, որը արդեն 26 տարի է, ինչ ղեկավարում է Բելառուսը։ Ըստ պաշտոնական տվյալների՝ առաջին օրերին ձերբակալվել է գրեթե 7000 մարդ։ Ընտրություններից անմիջապես հետո Բելառուսում փաստացի ժամանակավորապես արգելափակվել է համացանցը, ուժայինները բիրտ ուժ են կիրառել ցուցարարների նկատմամբ։

Լուսանկարը՝ «Associated Press» գործակալության