3000 դրամ վճար՝ անշարժ գույքի նկատմամբ իրավունքի ծագման, փոփոխման պետական գրացման դիմում ներկայացնելու համար
Արդարադատության նախարարությունը 3000 դրամ վճար է նախատեսում սահմանել անշարժ գույքի նկատմամբ իրավունքների ծագման, փոփոխման, փոխանցմանն ուղղված գործարքների դիմումների համար։
Նման որոշման նախագիծ է այսօր հանրային քննարկման ներկայացվել իրավական ակտերի նախագծերի հրապարակման միասնական կայքում։
Արդարադատության նախարարությունը նախագծում նշել է, որ հուլիսի 16-ին փոփոխություն է կատարվել «Նոտարիատի մասին» օրենքում։ Արդյունքում՝ որպես առանձին նոտարական գործողություն է նախատեսվել անշարժ գույքի նկատմամբ իրավունքների ծագման, փոփոխման, փոխանցմանն ուղղված գործարքներից ծագող իրավունքների պետական գրացման դիմումները համապատասխան պահանջի առկայությամբ պետական գրանցում իրականացնող լիազոր մարմին ներկայացնելու համար:
Այսպիսով, անձը իրավունքի պետական գրանցման դիմում կարող է ներկայացնել ինչպես անձամբ, այնպես էլ նոտարի միջոցով, իսկ վերջինիս համար էլ նման պահանջի դեպքում պարտականություն է առաջանում կատարել համապատասխան նոտարական գործողություն: Այդ գործողության համար նախատեսվելու է նոր վճար, որի սակագինը հաստատելու է կառավարությունը:
Լուսանկարը՝ emerj.com-ի
Մեկնաբանել