Փոխադրում իրականացնող որոշ վարորդներ մասնագիտական վերապատրաստում պետք է անցնեն. նոր նախագիծ
Ընդհանուր օգտագործման ավտոմոբիլային տրանսպորտով փոխադրումներ իրականացնող «C», «D», «CE», «DE», «C1E» և «D1E» կարգ ունեցող վարորդները պարբերական մասնագիտական վերապատրաստում պետք է անցնեն։
«Ավտոմոբիլային տրանսպորտի մասին» օրենքում փոփոխություններ կատարելու նախագիծ է Տարածքային կառավարման և ենթակառուցվածքների նախարարությունն այսօր հանրային քննարկման ներկայացրել։
Նախարարությունը նախատեսում է ավտոմոբիլային տրանսպորտով միջպետական բեռնափոխադրումներ և ուղևորափոխադրումներ իրականացնող կազմակերպություններին ներկայացվող պահանջները և միջպետական փոխադրումներ իրականացնելու գործընթացները կարգավորել։
Քննարկման ներկայացված նախագծով՝ ընդհանուր օգտագործման ավտոմոբիլային տրանսպորտով փոխադրումներ իրականացնող «C», «D», «CE», «DE», «C1E» և «D1E» կարգ ունեցող վարորդները պետք է հանձնեն նախնական մասնագիտական որակավորման տեսական քննություն և ստանան մասնագիտական որակավորման վկայագիր (ՄՈՎ): ՄՈՎ ունեցող վարորդներն առնվազն հինգ տարին մեկ պարբերականությամբ պետք է անցնեն մասնագիտական վերապատրաստման դասընթաց, որի վերաբերյալ պետք է նշում կատարվի վարորդի մասնագիտական որակավորման քարտի վրա: Առաջին վերապատրաստման դասընթացը վարորդը պետք է անցնի ոչ շուտ, քան ՄՈՎ-ը ստանալուց հինգ տարի հետո: Մասնագիտական վերապատրաստման գործընթացին և վարորդի որակավորման քարտին ներկայացվող պահանջները սահմանելու է կառավարությունը:
Տարածքային կառավարման և ենթակառուցվածքների նախարարությունը նախագծում նշել է, որ օրենսդրությամբ սահմանված է վարորդական վկայական ստանալու համար որակավորման պահանջները, սակայն որոշակի կատեգորիայի վարորդների պարբերական վերապատրաստման պահանջներ օրենսդրությամբ նախատեսված չէ:
Առաջարկվող մեկ այլ փոփոխությամբ՝ ավտոբուսներով (միկրոավտոբուսներով) և թույլատրելի առավելագույն 3,5 տոննա քաշը գերազանցող բեռնատար ավտոտրանսպորտային միջոցներով միջպետական փոխադրումներ (բացառությամբ ոչ առևտրային փոխադրումներ) իրականացնող կազմակերպությունները պետք է ունենան գործարար բարի համբավ, ֆինանսական անհրաժեշտ միջոցներ և մասնագիտական որակավորում։
Լիազոր մարմինը միջպետական փոխադրումներ իրականացնելու բոլոր տեսակի իրավունքները տրամադրելու է միայն այն կազմակերպություններին, որոնց վերաբերյալ անհրաժեշտ տվյալներն առկա են լիազոր մարմնի միջպետական փոխադրումներ իրականացնող կազմակերպությունների էլեկտրոնային գրանցամատյանում: Գրանցամատյանում հաշվառվելու համար կազմակերպությունները լիազոր մարմնին ներկայացնելու են բանկային տեղեկանք առնվազն 9000 եվրոյին համարժեք դրամ մեկ տրանսպորտային միջոցի դեպքում և առնվազն 5000 եվրոյին համարժեք դրամ՝ յուրաքանչյուր լրացուցիչ տրանսպորտային միջոցի համար, կամ բանկային երաշխիք սահմանված գումարի չափով, ինչպես նաև փոխադրումների կառավարչի մասնագիտական որակավորման վերաբերյալ տեղեկատվություն։
Կազմակերպությունը պետք է ունենա մասնագիտական որակավորման վկայական ունեցող փոխադրումների կառավարիչ: Մինչև 2021 թվականի հունվարի 1-ն ավտոմոբիլային տրանսպորտով ուղևորափոխադրումներ կամ բեռնափոխադրումներ իրականացնող կազմակերպություններում անընդմեջ 10 տարվա կառավարման ստաժ ունեցող անձինք ազատվելու են որակավորման քննություն հանձնելուց: Մասնագիտական որակավորման քննություններ ընդունելու և մասնագիտական որակավորման վկայական տալու կարգը, մասնագիտական որակավորման վկայականի նկարագիրը հաստատելու է կառավարությունը:
Իսկ կազմակերպության և փոխադրումների կառավարչի բարի համբավի կորստի հիմնական գործոններ են հանդիսանալու խախտումներն ու պատժամիջոցները հետևյալ ոլորտներում՝
1) առևտրային իրավունք.
2) անվճարունակության իրավունք.
3) վճարման և մասնագիտական աշխատանքի հետ կապված պայմաններ.
4) ճանապարհային երթևեկություն.
5) մասնագիտական պատասխանատվություն.
6) մարդկանց կամ թմրանյութերի առևտուր.
7) թվային տախոգրաֆի համակարգ.
8) փոխադրումներին ներկայացվող պահանջներ:
«Օրենսդրական փոփոխության արդյունքում Հայաստանի Հանրապետությունը կիրականացնի իր կողմից ստանձնած միջազգային պարտավորությունները, կբարձրանան ընդհանուր օգտագործման ավտոմոբիլային տրանսպորտով բեռնափոխադրումների և ուղևորափոխադրումների ոլորտում երթևեկության անվտանգության մակարդակը, փոխադրումներ իրականացնողների համար կսահմանվեն միջազգային չափանիշներ»,- նախագծում նշել է Տարածքային կառավարման և ենթակառուցվածքների նախարարությունը։
Մեկնաբանել