«Երևանի մշակույթի պետական քոլեջ» և «Երևանի էստրադային և ջազային արվեստի պետական քոլեջ» ՊՈԱԿ-ները չեն հաշտվել Կառավարության այն որոշման հետ, որով վերակազմակերպվել են իրենց կազմակերպությունները եւ ստեղծվել է նոր ՊՈԱԿ: Նշված քոլեջները օգոստոսի 18-ին հայց են ներկայացրել վարչական դատարան կառավարության ապրիլի 23-ի որոշումն անվավեր ճանաչելու պահանջով:

Գործով որպես պատասխանող նշվել են Կառավարությունն ու Կրթության, գիտության, մշակույթի և սպորտի նախարարությունը:

«Երևանի մշակույթի պետական քոլեջ»-ի տնօրենի պարտականությունները ժամանակավորապես կատարող Աննա Կիրակոսյանը «Հետք»-ի հետ հեռախոսազրույցում նախ ասաց, որ տեղյակ չէ հայցադիմումի մասին և որևէ հարցի չի կարող պատասխանել: Րոպեներ անց զանգահարեց և տեղեկացրեց, որ դատարան դիմելը եղել է կոլեկտիվների պահանջը, սակայն հայցադիմումը դատարան մուտք անելուց մեկ օր հետո որոշել են հետ վերցնել հայցադիմումը՝ հրաժարվելով դատական պաշտպանության իրենց իրավունքից:

Թե ինչու են որոշել մեկ օր անց հրաժարվել պահանջից, Ա. Կիրակոսյանը չպարզաբանեց, նշեց, թե հավելյալ տեղեկություններ չի կարող փոխանցել:

Նշենք, որ Կառավարությունն այս տարվա ապրիլի 23-ին որոշել է Կրթության, գիտության, մշակույթի և սպորտի նախարարության «Երևանի մշակույթի պետական քոլեջ» և «Երևանի էստրադային և ջազային արվեստի պետական քոլեջ» ՊՈԱԿ-ները միաձուլման ձևով վերակազմակերպել` ստեղծելով դարձյալ նախարարության ենթակայության տակ գործող «Երևանի Շառլ Ազնավուրի անվան մշակույթի պետական քոլեջ» ՊՈԱԿ:

Հիմնավորման մեջ նշվում էր, որ երկու ՊՈԱԿ-ներն էլ ուսումնական գործընթացն իրականացնում են նույն շենքի տարբեր հարկերում: Իրականացնում են գրեթե միևնույն մասնագիտական ուսուցումը, և հարկերով առանձնացված լինելու հանգամանքից ելնելով՝ խաթարվում է ուսումնական հաստատությունների բնականոն գործընթացը: Օրինակ՝ «Երգեցողություն», «Դերասանական արվեստ», «Ռեժիսուրա» և «Էստրադային արվեստ» մասնագիտությունները կրկնվում են և ուսուցանվում են երկու ուսումնական հաստատություններում էլ:

Միաձուլման արդյունքում, նոր հաստիքացուցակի հաստատմամբ հնարավոր են հաստիքների կրճատումներ, մասնավորապես՝ վարչական և ուսումնաօժանդակ, պայմանավորված նոր ուսումնական տարվա սկզբին արտադրական ծավալների փոփոխմամբ  (սովորողների թվի փոփոխություն):

Լուսանկարը՝ Երևանի մշակույթի պետական քոլեջ»-ի ֆեյսբուքյան էջից