Այս տարի անցկացված ստուգումների արդյունքում պարզվել է, որ հանրապետությունում ավելացել է կովերի, խոզերի, ոչխարների եւ այծերի գլխաքանակը: Հաշվառումն անց է կացվել բոլոր մարզերի 312 գյուղական բնակավայրերի 10436 գյուղացիական տնտեսություններում: 

Անասնագլխաքանակի ամենամյա համատարած հաշվառումն անց է կացվել հանրապետության բոլոր  տնտեսություններում տեղական ինքնակառավարման մարմինների կողմից (ՀՀ  մարզպետարանների և ՀՀ  գյուղատնտեսության  նախարարության հետ համատեղ) 2012 թ. հունվարի 1-ի  դրությամբ: Գյուղատնտեսությամբ զբաղվող առևտրային կազմակերպությունների ցուցանիշները հավաքագրվել են վիճակագրական հաշվետվությունների միջոցով:

Հունվար-փետրվարին ՀՀ ազգային վիճակագրական ծառայության կողմից հանրապետության բոլոր մարզերի 312 գյուղական բնակավայրերի 10436 գյուղացիական տնտեսություններում անց են կացվել անասնագլխաքանակի հաշվառման արդյունքների ստուգումներ (ստուգաճշտումներ), որոնց նպատակը եղել է անասնագլխաքանակի համատարած հաշվառման տվյալների արժանահավատության գնահատումը:  

Ստուգաճշտմամբ ստացված տվյալներով ճշգրտվել են համատարած հաշվառման արդյունքները, այսպես. խոշոր եղջերավոր անասունների  գլխաքանակն ավելացել է 1.0 %-ով, կովերինը` 1.2 %-ով, խոզերինը` 6.3 %-ով, ոչխարներինը  և այծերինը` 2.5 %-ով:

Ըստ ԱՎԾ-ի՝ հանրապետությունում հունվարի 1-ի դրությամբ հաշվառվել է 599.243 խոշոր եղջերավոր անասուն, որից 283.349-ը՝ կով:  Խոզերի թիվը կազմել է 108.088, ոչխարներինը՝ 561.634, այծերինը՝ 28.580: Ամենափոքրը եղել է ձիերի թվաքանակը՝ 9.912: