![](/static/articles/12/09/62/l-1o3l5wT3QB.jpg)
Պուտինը Լուկաշենկոյի խնդրանքով ստեղծել է իրավապահ մարմինների աշխատակիցներից բաղկացած ռեզերվ
Ռուսաստանի նախագահ Վլադիմիր Պուտինը հայտարարել է, որ Ռուսաստանում ձևավորվել է իրավապահ մարմինների աշխատակիցների ռեզերվ, որն անհրաժեշտության դեպքում կարող է ուղարկվել Բելառուս։ Այդ մասին Պուտինը հայտարարել է «Россия» հեռուստաընկերությանը տված հարցազրույցում։
Նրա խոսքերով՝ ռեզերվը ձևավորվել է Բելառուսի նախագահ Ալեքսանդր Լուկաշենկոյի խնդրանքով։ Պուտինը նշել է, որ դեռևս անհրաժեշտություն չկա ռուս ուժայիններին ուղարկել Բելառուս։ «Ռուսական ուժերը չեն կիրառվի մինչ այն պահը, երբ Բելառուսի ծայրահեղական տարրերը չեն անցնի սահմանը և չեն սկսի անկարգություններ»,- հավելել է ՌԴ նախագահը։
Նա նաև նշել է, որ Բելառուսում առկա քաղաքական ճգնաժամի ժամանակ Ռուսաստանն իրեն դրսևորել է առավել զուսպ և չեզոք, քան եվրոպական երկրները և Միացյալ Նահանգները։
Հիշեցնենք, որ Ալեքսանդր Լուկաշենկոն դեռ օգոստոսի 15-ին հայտարարել էր, որ Վլադիմիր Պուտինը խոստացել է «համակողմանի օգնություն Բելառուսի անվտանգության ապահովման համար», որն իրականացվելու է Բելառուսի ՀԱՊԿ անդամակցության շրջանակներում։
Լուսանկարը՝ «ВГТРК»-ի
Մեկնաբանել