![](/static/articles/01/21/04/l-NS88PrRc1n.jpg)
Բանակը պետք չէ «բոբո» սարքել
Ազգային ժողովի կիսադատարկ դահլիճում այսօր քննարկվեց «Արտակարգ դրության իրավական ռեժիմի մասին» օրինագիծը: Կառավարության ներկայացրած օրինագիծն առաջին ընթերցմամբ ընդունվել էր 2012թ. մարտի 1-ին:
Օրենքի նախագծին դեմ են արտահայտվում խորհրդարանական ընդդիմության պատգամավորները: Նույնիսկ ՀՀԿ-ական պատգամավոր Ռաֆիկ Պետրոսյանը դեմ քվեարկեց առաջին ընթերցման ժամանակ:
«Ժառանգության» պատգամավորները խորհրդարանական մեծամասնությանը հիշեցրին 2008թ. մարտի 1-ի ողբերգական իրադարձություններն ու քննադատեցին զինված ուժերի ներգրավվածությունը հետընտրական իրադարձություններին: Ընդդիմությունը կարծում է, որ օրենքի նախագիծն այս տեսքով ընդունելու դեպքում չի բացառվում Մարտի 1-ի կրկնությունը, քանի օր օրենքով զինված ուժերը եւս մասնակցելու են հայտարարված արտակարգ ռեժիմի ընթացքում կատարվող գործողություններին:
Ավելի զգացմունքային էր պատգամավոր Զարուհի Փոստանջյանի ելույթը: Ըստ նրա՝ հնարավոր են իրավիճակներ, երբ հայ բանակի զինվորը ստիպված է լինելու կրակ բացել նույնիսկ իր հարազատների, ծնողների վրա:
ԱԺ պետաիրավական հարցերի մշտական հանձնաժողովի նախագահ Դավիթ Հարությունյանն էլ հանգստացրեց պատգամավորին` ասելով, թե «չի կարող պատահել, որ զինված ուժերն օգտագործվեն քաղաքական դրդապատճառներով»:
«Ժառանգություն» խմբակցության ղեկավար Ստյոպա Սաֆարյանը պատգամավորներին եւ օրինագծի հեղինակնեին առաջարկեց դիմել Սահմանադրական դատարան, որպեսզի համոզվեն, թե արդյոք նախագիծը չի հակասում Սահմանադրությանը:
Առաջարկին ի պատասխան ՀՀԿ խմբակցության ղեկավար Գալուստ Սահակյանը հայտարարեց, թե բանակը պետք չէ «բոբո» սարքել, քանի որ օրենքի նախագծի նպատակն ամենեւին էլ արտակարգ դրության դեպքում բանակի օգտագործումը չէ:
Մեկնաբանել