«Պռոշյան կոնյակի գործարանի» Արմավիրի մարզի մասնաճյուղում մոտ մեկ ժամ առաջ ուժեղ պայթյուն է տեղի ունեցել: Նախնական տվյալներով՝ մահացել է՝ 2, տարբեր աստիճանի մարմնական վնասվածքներով «Արմավիրի բժշկական կենտրոն» է տեղափոխվել 4 քաղաքացի:

«Արմավիրի բժշկական կենտրոնի» ընդունարանից փոխանցեցին, որ 4 քաղաքացիներն իրենց մոտ են տեղափոխվել շտապօգնության ավտոմեքենայով՝ ժամը 12:35-ի սահմաններում: Նրանք գտնվում են վերակենդանացման բաժանմունքում:

Տեղեկացրին նաև, որ այժմ էլ շտապօգնության ավտոմեքենաները գտնվում են դեպքի վայրում և հնարավոր է նոր տուժածների տեղափոխեն:

Բժշկական կենտրոնի տնօրեն Հարություն Զուռնաչյանը չկարողացավ պարզաբանումներ ներկայացնել. «Շատ խառն ենք, նոր արտակարգ դեպք է տեղի ունեցել»:

Փորձեցինք պարզաբանում ստանալ նաև «Պռոշյան կոնյակի գործարանի»-ից: Ընդունարանից «Հետք»-ին փոխանցեցին, որ առայժմ տեղեկություններ չունեն, թե գործարանի որ հատվածում է տեղի ունեցել պայթյունը և ինչի հետևանքով:

Այս պահին դեպքի վայրում են գտնվում իրավապահ մարմինների և Արտակարգ իրավիճակների նախարարության աշխատակիցները:

Լուսանկարում՝ Արմավիրի բժշկական կենտրոն