ԱԺ գործող պատգամավոր, ՀՖՖ նախագահ Ռուբեն Հայրապետյանը (Նեմեց Ռուբո), որ նախորդ շաբաթ տեղի ունեցած ասուլիսում հայտարարել էր ԱԺ առաջիկա ընտրություններին մասնակցելուց հրաժարվելու մասին, այսօր կամ վաղը պատգամավորի թեկնածու է առաջադրվելու Ավանի թիվ 1 ընտրատարածքում: Երեկ այս մասին «ՀԺ» թղթակցին հայտնել է ԱԺ մեկ այլ պատգամավոր Սամվել Ալեքսանյանը (Լֆիկ Սամո):

Նախորդ շաբաթվա ասուլիսում Ռ.Հայրապետյանն ասել էր, որ պատգամավորի թեկնածու չի առաջադրվելու, և այդ մտադրությունից իրեն կարող է ետ համոզել միայն Սամվել Ալեքսանյանը: «ՀԺ» թղթակիցն էլ Ս.Ալեքսանյանից հետաքրքրվել էր՝ պատրաստվո՞ւմ է համոզել Հայրապետյանին: «Այո, պատրաստվում ենք: Որ տեսնեմ, կզանգեմ, հետո կասեմ՝ համոզել եմ, թե չեմ համոզել»,- ասել էր նա:

Երեկ Ալեքսանյանը «ՀԺ» թղթակցին զանգել-ավետել է, որ իրեն հաջողվել է կատարել առաքելությունը, այսինքն՝ Հայրապետյանին համոզել, որ մեծամասնականով առաջադրվի:

Այս լուրի կապակցությամբ երեկ «ՀԺ» թղթակիցը փորձել է պարզաբանումներ ստանալ ՀՖՖ նախագահի օգնական Արայիկ Մանուկյանից, որը, սակայն, հրաժարվել է որևէ մեկնաբանությունից:

Այնուամենայնիվ, առայժմ դժվար է գնահատել այս տեղեկության լրջությունը: Բայց եթե Ռուբեն Հայրապետյանն իրոք առաջադրվելու է, սա պիտի անի միայն ու միայն Սերժ Սարգսյանի անձնական հրահանգով: Իսկ եթե Սերժ Սարգսյանը նման հրահանգ է տալիս Հայրապետյանին, նշանակում է՝ իր կուսակցության նախընտրական վիճակը համարում է աղետալի, որովհետև այսօրինակ քայլերով արձանագրում է եվրաընտրություններ անելու իր խոստման անիրագործելիությունը և մենթալիտետային մեթոդների անցնելու անխուսափելիությունը:

Նման որոշման պատճառը պարզ է. նորմալ ընտրությունների անցկացման պարագայում ՀՀԿ-ն ջախջախիչ պարտություն կկրի: Առնվազն, չի ունենա խորհրդարանական մեծամասնություն: