Կառավարությունն ու պատգամավորները փորձում են օրենսդրորեն լուծել պաշտոնյաների աշխատավարձի բարձրացման հարցը
Կառավարությունն ու խորհրդարանը օրենսդրական նախաձեռնություն են մշակում` փորձելով լուծել հանրային ծառայողների աշխատավարձերի բարձրացման հարցը:
Այս մասին սեպտեմբերի 3-ին խորհրդարանում լրագրողների հետ զրույցում ասաց Պետական-իրավական հարցերի մշտական հանձնաժողովի նախագահ Վլադիմիր Վարդանյանը:
Քաղաքական մեծամասնության պատգամավորի համոզմամբ` այժմ հանրային ծառայությունը հրապուրիչ չէ, և շատ չէ այն մարդկանց թիվը, որոնք ցանկանում են համալրել պետական ծառայողների շարքերը:
«Որովհետև երբ դու վերացնում ես բոլոր տեսակի կոռուպցիոն ռիսկերը, վերացնում ես սև մեխանիզմները, որոնցով անձը կարողանում է գումար վաստակել, երբ չես կարողանում պրոֆեսիոնալի համար ապահովել այնպիսի աշխատավարձ, որը կմղի նրան հանրային ծառայության, լինելու է այս խնդիրը»,- ասաց նա:
Վարդանյանի խոսքով` պետական ծառայողների ստացած պարգևավճարների, հավելավճարների թեման շատ է քննարկվել։ Ըստ նրա՝ հանրային որակյալ ծառայություններ ստանալու համար անձն արժանապատիվ աշխատավարձ պետք է ստանա: Այս խնդրի լուծման համար Կառավարությունը և խորհրդարանն ակտիվ աշխատում են:
Հիշեցնենք, որ պետական պաշտոնյաների աշխատավարձի հարցին բազմիցս անդրադարձել է վարչապետ Նիկոլ Փաշինյանը` ընդգծելով, որ պետք է լինի այնպիսի օրենսդրական լուծում, որ հավելավճարներն ու պարգևավճարները արտացոլված լինեն աշխատավարձում: Սա նշանակում է, որ ամենայն հավանակությամբ փոփոխություններ կլինեն պետական պաշտոններ զբաղեցնող անձանց վարձատրության մասին օրենքում և կբարձրացվեն պաշտոնյաների աշխատավարձի հաշվարկման համար նախատեսված դրույքաչափերը:
Հիշեցնենք, որ ամենաբարձր աշխատավարձ ստացող պաշտոնյան Հանրապետության նախագահն է, նրա աշխատավարձը (հարկերը ներառյալ) 1 միլիոն 322 հազար 400 դրամ է (բազային աշխատավարձը` 66120X20 դրույքաչափի գործակից), պատգամավորների աշխատավարձի դրույքաչափը 10 է, հետևաբար աշխատավարձը 661 հազար 200 դրամ է, որն էլ իր հերթին հարկվում է:
Մեկնաբանել