Նավալնին դուրս է եկել արհեստական կոմայից
Ռուս ընդդիմադիր քաղաքական գործիչ Ալեքսանդր Նավալնու առողջական վիճակը լավացել է, քաղաքական գործիչը դուրս է եկել արհեստական կոմայից։ Այդ մասին նշվում է Բեռլինի «Charite» կլինիկայի սեպտեմբերի 7-ին տարածած հաղորդագրության մեջ։
Հաղորդագրության մեջ նշվում է, որ Նավալնուն աստիճանաբար անջատում են թոքերի արհեստական շնչառության ապարատից։ Բժիշկների խոսքերով՝ դեռևս վաղ է գնահատել թունավորման երկարատև հետևանքները։
1/2 ?? Der Gesundheitszustand von Alexei #Nawalny hat sich verbessert. Das durch Medikamente aufrechterhaltene künstliche Koma des Patienten konnte beendet werden. Der Patient wird schrittweise von der maschinellen Beatmung entwöhnt.
— Charité - Universitätsmedizin Berlin (@ChariteBerlin) September 7, 2020
Գերմանիայի զինված ուժերի հատուկ լաբորատորիան «Charite» կլինիկայի խնդրանքով իրականացրել է Նավալնու մեզի, արյան և մաշկի թունաբանական հետազոտություն։ Փորձագետները պարզել էին, որ Նավալնու մաշկի, մեզի և արյան մեջ առկա է «Նովիչոկ» խմբի թույն։ Ավելի վաղ Գերմանիայի կառավարության պաշտոնական ներկայացուցիչ Շտեֆեն Զայբերտը հայտարարել էր, որ լաբորատորիայի եզրակացությունները կասկածի տեղիք չեն տալիս։
Հիշեցնենք, որ ռուս ընդդիմադիր քաղաքական գործիչ Ալեքսեյ Նավալնին օգոստոսի 20-ին վատացել էր Տոմսկ-Մոսկվա ինքնաթիռում։ Նա հոսպիտալացվել էր Օմսկում, իսկ երկու օր անց տեղափոխվել Բեռլինի «Charite» կլինիկա։
Գերմանիայի կանցլեր Անգելա Մերկելը Նավալնուն անվանել է «հանցագործության զոհ» և Ռուսաստանից պահանջել բացատրություններ։ Եվրամիությունը և Միացյալ Նահանգները սպառնացել են պատժամիջոցներ սահմանել Ռուսաստանի նկատմամբ։ Կրեմլն էլ հայտարարել է, որ չի տեսնում որևէ հիմնավորում՝ Ռուսաստանին առաջադրված մեղադրանքների հիմքում։
Լուսանկարը՝ EPA-ի
Մեկնաբանել