Կենտրոնական բանկը նախատեսում է բանկային հաշիվների կենտրոնացված ռեեստր ստեղծել
Կենտրոնական բանկը նախատեսում է ստեղծել բանկային հաշիվների կենտրոնացված ռեեստր։
«Հայաստանի Հանրապետության կենտրոնական բանկի մասին» օրենքում նման փոփոխություն կատարելու նախագիծ է այսօր հանրային քննարկման ներկայացվել իրավական ակտերի նախագծերի հրապարակման միասնական կայքում։
Ըստ օրենսդրական փոփոխության՝ Կենտրոնական բանկը իր նպատակների և գործառույթների իրականացման, այդ թվում՝ ներպետական իրավասու մարմինների հետ համագործակցության արդյունավետության բարձրացման նպատակով վարելու է բանկային հաշիվների կենտրոնացված ռեեստր։ Ռեեստրին պարտադիր մասնակցելու են Հայաստանի տարածքում գործող բոլոր առևտրային բանկերը:
Բանկային հաշիվների կենտրոնացված ռեեստրը ներառելու է բանկի հաճախորդ ֆիզիկական և իրավաբանական անձանց բանկային հաշվի համարը, բանկային հաշվի բացման և փակման, բանկային պահատուփի տրամադրման և օգտագործման դադարեցման ամսաթվերը, հաճախորդի և հաճախորդի կողմից լիազորված անձի նույնականացման տվյալները, ինչպես նաև բանկի վերաբերյալ տեղեկությունները:
Բանկային հաշիվների կենտրոնացված ռեեստրի վարման կարգը, ներառման ենթակա նույնականացման տվյալների և բանկի վերաբերյալ տեղեկությունների ցանկը, տեղեկությունների տրամադրման ընթացակարգը սահմանվելու են Կենտրոնական բանկի խորհրդի որոշմամբ։
Եթե Ազգային ժողովը հաստատի այս փոփոխությունները, դրանք ուժի մեջ կմտնեն 2021 թվականի հունվարի 1-ից:
Մեկնաբանել