Ուզբեկստանի իշխանությունները պայմանավորվել են Շվեյցարիայի հետ Ուզբեկստանի առաջին նախագահ Իսլամ Քարիմովի դստեր՝ Գյուլնարա Քարիմովայի ակտիվներից 131 միլիոն դոլարի վերադարձի շուրջ։ Այդ մասին հայտարարել է Շվեյցարիայի կառավարությունը։ Գումարները 2012 թվականից պահվում էին շվեյցարական բանկերում։

Շվեյցարիայի իշխանությունները պայման են դրել, որ վերադարձված ակտիվները պետք է ծախսվեն Ուզբեկստանի բնակչության կենսամակարդակի բարելավման նպատակով և ներդրվեն այնպիսի ծրագրերում և նախագծերում, որոնք խթանում են կայուն զարգացումը։ Բացի այդ, Շվեյցարիան խնդրել է ապահովել փողերի «թափանցիկ օգտագործումը»։ 

2012 թվականին Շվեյցարիայի գլխավոր դատախազությունը Գյուլնարա Քարիմովայի վերաբերյալ քրեական գործի շրջանակներում սառեցրել էր մոտ 800 միլիոն շվեյցարական ֆրանկ արժողությամբ ակտիվները։ Մոտ 131 միլիոն դոլարը վերջնականապես առգրավվել է 2019 թվականին։ Եվս 650 միլիոն շվեյցարական ֆրանկ (715 միլիոն դոլար) դեռեւս սառեցված է։

Տաշքենդի քրեական գործերով քաղաքային դատարանը 2020 թվականի մարտին մինչև 13 տարի և 4 ամիս ժամկետով ավելացրել էր Քարիմովայի դատավճիռը։ Նա մեղադրվում էր հանցավոր համագործակցության կազմակերպման, դրամաշորթության և հափշտակությունների մեջ։

2015 թվականի օգոստոսին Քարիմովան դատապարտվել էր շորթման և հարկերի վճարումից խուսափելու համար, իսկ 2017 թվականի վերջին մեկ այլ գործի շրջանակներում դատապարտվել 10 տարվա ազատազրկման։ Ավելի ուշ դատավճիռը փոխվել էր 5 տարի ազատազրկմամբ։ 2019 թվականի սկզբին Քարիմովան տեղափոխվել է բանտ։ Նրա փաստաբանները պնդում են, որ նույնիսկ իրենք չգիտեն, թե վերջնական քանի տարով է ազատազրկվել Ուզբեկստանի նախկին նախագահի դուստրը։

Լուսանկարը՝ Keystone / Sergei Ilnitsky