Ռուսաստանի նախագահ Վլադիմիր Պուտինը Բելառուսի նախագահ Ալեքսանդր Լուկաշենկոյի հետ հանդիպման ժամանակ հայտարարել է, որ Ռուսաստանը Բելառուսին կտրամադրի 1,5 միլիարդ դոլարի չափով վարկ։ Երկու երկրների ղեկավարների հանդիպումը հեռարձակել է RT-ի յութուբյան ալիքը։

«Մենք պայմանավորվել ենք այն մասին, որ Ռուսաստանն այս դժվարին պահին 1,5 միլիարդ դոլարի չափով պետական վարկ կտրամադրի և մենք դա կանենք։ Հիմա, ինչքանով հայտնի է, մեր ֆինանսների նախարարները պրոֆեսիոնալ մակարդակում աշխատում են այս ուղղությամբ»,- նշել է Պուտինը՝ Սոչիում տեղի ունեցած հանդիպման ժամանակ։

Ռուսաստանը Բելառուսի կառավարության արտաքին փոխառությունների հիմնական աղբյուրն է։ 2020 թվականի առաջին եռամսյակի դրությամբ՝ ռուսական վարկերին բաժին է հասել երկրի արտաքին պարտքի 48 տոկոսը՝ 7,92 մլրդ դոլար: Սկսած 2008 թվականից Ռուսաստանի կառավարությունը և Ռուսաստանի զարգացման պետական կորպորացիան Բելառուսին տրամադրել է առնվազն 8 վարկ։ 

Օգոստոսի վերջին Ալեքսանդր Լուկաշենկոն հայտարարել էր, որ Վլադիմիր Պուտինի հետ պայմանավորվել է ավելի վաղ Մինսկին տրամադրված մեկ միլիարդ դոլարի չափով վարկի վերաֆինանսավորման մասին։ Սեպտեմբերին հայտնի է դարձել, որ Բելառուսի իշխանությունները Ռուսաստանի կառավարությանը հայտ են ուղարկել 2021 թվականին Ռուսաստանի հանդեպ պետական պարտքը 600 մլն դոլարի չափով վերաֆինանսավորման համար:

Լուսանկարը՝ РИА Новости / RIA Kremlin Pool