Ուկրաինայի և Բելառուսի պետական սահմանին շարունակվում է հազարավոր հասիդների մասնակցությամբ ճգնաժամը, որոնք արդեն մի քանի օր է չեն կարողանում հատել Ուկրաինայի սահմանը։ Այդ մասին գրում է «BBC»-ն։ Չնայած Ուկրաինան հայտարարել է, որ չի թույլատրի հասիդների մուտքը երկիր, հոգևոր հրեաները չեն պատրաստվում հեռանալ։

Սեպտեմբերի 17-ին Իսրայելի բարձրագույն կրթության և ջրային ռեսուրսների նախարար Զեև Էլկինը հասիդներին կոչ է արել վերադառնալ հայրենիք և հրեական նոր տարին՝ Ռոշ Հաշանան, դիմավորել Իսրայելում՝ պահպանելով կարանտինային բոլոր սահմանափակումները։

למרות מאמצים רבים שנעשו כדי לסייע לישראלים שניסו להיכנס לאוקראינה דרך בלרוס או מולדובה הגיעה הבוקר תשובה סופית שלילית משלטונות אוקראינה. אוקראינים הודיעו שלא יאפשרו לא כניסה דרך מעברי גבול ולא שום משלחת מצומצמת. אני קורא לאזרחינו לחזור לארץ ולהישמע להנחיות הבידוד בחזרתם. שנה טובה

— Zeev Elkin (@zeev_elkin) September 17, 2020

Հասիդները ցանկանում են Ռոշ Հաշանան դիմավորել Ուկրաինայի Ուման քաղաքում, որտեղ գտնվում է ռաբբի Նահմանի գերեզմանը։ Այս ավանդույթն առկա է արդեն մի քանի տասնամյակ։ Սակայն այս տարի, կորոնավիրուսի համավարակի պատճառով, Ուկրաինան խիստ սահմանափակումներ է կիրառում երկիր արտասահմանցիների այցելության հարցում, ինչպես նաև զանգվածային միջոցառումների անցկացման գործընթացում, այդ թվում նաև կրոնական։

Իսրայելի և Ուկրաինայի իշխանությունները պայմանավորվել են կանխել ուխտագնացությունը դեպի շիրիմ, սակայն այդ հանգամանքը չի կանգնեցրել ամենամոլի ուխտագնացներին և նրանք փորձել են Ուկրաինա մտնել Բելառուսի տարածքով։ Հասիդական որոշ ընտանիքներ արդեն երեք շաբաթ է փաստացի գտնվում են սահմանային անցակետերի մոտ՝ բաց երկնքի տակ։ Իր ուղերձում Էլկինը նաև նշում է, որ որոշ հասիդներ փորձում են հատել ուկրաինա-մոլդովական սահմանը։

Նախօրեին Կիևն ու Մինսկը փոխանակվել են կտրուկ հայտարարություններով։ Կողմերը ճգնաժամի պատասխանատվությունը բարդում են մեկը մյուսի վրա։ Ուկրաինայի նախագահ Վլադիմիր Զելենսկու գրասենյակը դիմել է Բելառուսի իշխանություններին՝ խնդրելով չտարածել կեղծ տեղեկություններ այն մասին, որ ուկրաինա-բելառուսական սահմանը բաց է։ Իր հերթին Բելառուսի ԱԳՆ-ն Կիևին կոչ է արել հարթել ճգնաժամը։

Ավելի վաղ, Ուկրաինայի արտաքին գործերի նախարարությունը դիմել էր Բելառուսին` խնդրելով  թույլ չտալ Ուկրաինայի սահմանակետերին մոտենալ բոլոր այն կատեգորիաների անձանց, որոնք չեն մտնում Ուկրաինայի կառավարության կողմից սահմանված բացառությունների ցանկի մեջ։ Սեպտեմբերի 17-ի տվյալներով՝ սեպտեմբերի 14-17-ն ընկած ժամանակահատվածում «Նովայա Գուտա» անցակետի մաքսավորները ելքի թույլտվություն են տվել Իսրայելի 1216 քաղաքացիների, որոնցից 84-ը մինչև 12 տարեկան երեխաներ են, 253-ը՝ 12-18 տարեկան դեռահասներ։ 

Սեպտեմբերի 15-ին Լուկաշենկոյի մամուլի քարտուղար Նատալյա Էյսմոնտը ուկրաինական կողմին կոչ էր արել մտածել կանաչ միջանցքի ստեղծման մասին։ Ընդ որում, նա նշել էր, որ Բելառուսը պատրաստ է ուխտագնացներին ապահովել տրանսպորտով։ Մինսկը Կիևին կոչ էր արել հարգել հավատացյալների իրավունքները։ 

«Լսեք, հերիք է զբաղվեք խնդրի խորացմամբ։ Կա հարց և այն պետք է և հնարավոր է լուծել։ Ավելին կա 1000 մարդ, որոնք ստիպված են գիշերել բաց երկնքի տալ։ Դա անմարդկային է։ Եվ հիմա կարևորը դա է, այլ ոչ թե դեմագոգիան և ուկրաինական իշխանությունների փորձերը պատասխանատվությունը դնել մյուս կողմի վրա»,- հայտարարել է Բելառուսի ԱԳՆ մամլո քարտուղար Անատոլի Գլազը։

Ուկրաինայի նախագահի գրասենյակի տարածած հաղորդագրությունից պարզ է դառնում, որ պաշտոնական Կիևը չի բացառում այն հանգամանքը, որ բելառուսական կողմը մտածված քաոսային իրավիճակ է ստեղծում Ուկրաինայի հետ սահմանին։ «Ստիպված ենք նաև արձանագրել, որ Բելառուսի փաստացի գործող իշխանության որոշ ներկայացուցիչների կողմից անձնական վիրավորանքն այսօր տարածվում է, ցավոք, նաև միջպետական հարաբերությունների հարթությունում։ Ուկրաինան, հիշեցնենք, չեզոք դիրքորոշում է որդեգրել Բելառուսի քաղաքական ճգնաժամի հարցում, որն առաջացել է այս տարվա օգոստոսի 9-ին՝ Բելառուսում կասկածելի արդյունքներով նախագահական ընտրություններից հետո»,- նշվում է Կիևի պաշտոնական հայտարարության մեջ։

Ուկրաինա-բելառուսական հարաբերությունների լարումը ձգվում է արդեն մեկ ամսից ավելին։ Ուկրաինայի նախագահ Վլադիմիր Զելենսկին դատապարտել է Բելառուսում ցուցարարների նկատմամբ կիրառված բռնությունները, իսկ Լուկաշենկոն Ուկրաինային մեղադրել է սադրիչների պատրաստման մեջ։

Սեպտեմբերի 15-ի առավոտյան Բելառուսի սահմանապահ ծառայությունը հայտարարել է, որ սահմանին գտնվում է մոտ 700 մարդ, սակայն ավելի ուշ հավելել, որ հսկիչ անցագրային կետին է մոտեցել ևս մի քանի մարդ։ Նշվում է, որ ոմանք փորձում են սահմանը հատել՝ շրջանցելով սահմանային անցակետերը։ Ուխտագնացներից մեկը, որը փորձել է սահմանն անցնել ճահճի միջով, հինգ տարի մուտքի արգելքով արտաքսվել է Ուկրաինայից։

Սահմանի մոտ նկատվում է հավելյալ ուժերի կուտակում, որը միտված է հանրային կարգի պահպանմանը։ Սահմանապահներին օգնում են Ազգային գվարդիան և ոստիկանությունը։ Ծառայությանը ներգրավվել է նաև ռազմական ավիացիան։ Սահմանին առկա իրավիճակը հսկվում է անօդաչուների կողմից։

Լուսանկարը՝ EPA / ТАСС