Կոտայքի մարզի Հրազդան համայնքը դիմել է առաջին ատյանի ընդհանուր իրավասության դատարան ապօրինի վաճառված անտառները համայնքին վերադարձնելու նպատակով։ Ապօրինի աճուրդները տեղի էին ունեցել 2007-2009 թ.-ին, որի վերաբերյալ «Հետք»-ը՝ «Պաշտոնյաները Ծաղկաձորում 50 հեկտար անտառ են սեփականաշնորհել» վերտառությամբ հետաքննություն էր հրապարակել։

Դատական տեղեկատվական համակարգից տեղեկանում ենք, որ 2020 թ.-ի օգոստոսի 27-ին Հրազդանի համայնքապետարանը դիմել է Կոտայքի մարզի ընդհանուր իրավասության դատարան՝ աճուրդներն անվավեր ճանաչելու և անվավերության հետևանքներ կիրառելու պահանջով։ Պատասխանողները 10-ն են։ Գործը մակագրվել է Կոտայքի մարզի ընդհանուր իրավասության դատարանի դատավոր Արիստակես Սիսակյանին։

Դատական գործով պատասխանողներն են՝ Հրազդանի նախկին քաղաքապետ Արամ Դանիելյանի կինը՝ Զարիկ Դանիելյանը, Չարենցավանի բնակիչ Աշոտ Խաչատրյանը, ԱԺ նախկին պատգամավոր Հարություն Ղարագյոզյանի կինը՝ Շամրիկ Գաբրիելյանը, Հրազդանի նախկին քաղաքապետ Արամ Դանիելյանի խորհրդականի որդին՝ Արսեն Արզումանյանը, գործարար Սամվել Մայրապետյանը, «Հայանտառ» ՊՈԱԿ-ի նախկին տնօրեն Մարտուն Մաթևոսյանը, Աշխատանքի և սոցիալական հարցերի նախկին նախարար Աղվան Վարդանյանի եղբայրը՝ Իշխան Վարդանյանը, Կոտայի նախկին մարզպետ Կովալենկո Շահգալդյանի մերձավոր՝ Չարենցավանի «Մշակույթ» ՀՈԱԿ-ի տնօրեն Ռոման Գալուստյանը և քաղաքացիներ Սամվել Գրիգորյանն ու Անահիտ Առաքելյանը։

Հրազդան համայնքում կազմակերպված ապօրինի աճուրդների հետևանքով այս անձինք դարձել են անտառների սեփականտերեր, հետագայում նրանց մի մասը գույքն օտարել էր այլ անձանց և կազմակերպությունների։ Օրինակ՝ Ծաղկաձորի Մհեր Մկրտչյան փողոցի 4 հեկտար անտառային հողակտորներն այսօր գրանցված են «Ուիլիամս ինկորպորացիա» ՍՊԸ-ի անունով: ՍՊԸ-ի հիմնադիրներից մեկը Նիկիտա Աբրահամյանն է: Բռնցքամարտիկ Արթուր Աբրահամի ազգականը։ Հողերը աճուրդում ձեռք են բերել պատասխանողներ Անահիտ Առաքելյանն ու Սամվել Գևորգյանը, հետագայում օտարել նշված ՍՊԸ-ին։ Նույն տարածքում գտնվող մեկ այլ անտառային հող էլ՝ 4.8 հա մակերեսով, ապօրինի աճուրդում գնել է Չարենցավան համայնքի բնակիչ Աշոտ Խաչատրյանը, որը հետագայում հողն օտարել է նախկին վարչապետ Հովիկ Աբրահամյանի վարորդին՝ Գրիգոր Գևորգյանին։ Չարենցավանի «Մշակույթ» ՀՈԱԿ-ի տնօրեն Ռոման Գալուստյանի գնած անտառային հողն էլ  հետագայում օտարվել է Քննչական կոմիտեի նախկին նախագահ Աղվան Հովսեփյանի որդուն՝ Արմեն Հովսեփյանին։ 

«Պաշտոնյաները Ծաղկաձորում 50 հեկտար անտառ են սեփականաշնորհել»  վերնագրով հոդվածի հրապարակումից հետո քրեական գործ հարուցվեց, որը քննվեց Հատուկ քննչական ծառայությունում։ Թեև քրեական գործը վաղեմության ժամկետն անցած լինելու հիմքով կարճվեց, բայց նախաքննության ժամանակ հաստատվեց, որ անտառային հողերն ապօրինի են վաճառվել։ Դրանից հետո ՀՔԾ-ն դիմեց Տարածքային կառավարման և ենթակառուցվածքների նախարարություն, որպեսզի ապօրինի օտարված անտառները համայնքներին վերադարձնելու գործընթաց սկսվի։ Անտառային հողերի մի մասը օտարվել է Կոտայքի մարզպետարանի կազմակերպված աճուրդներով։ Այդ հողերը պետությանը վերադարձնելու նպատակով Գլխավոր դատախազության պետաշան շահերի պաշտպանության վարչությունում պետական շահերի հայց էր հարուցվել։ Դատախազությունը դիմել էր դատարան աճուրդների որոշումներն առոչինչ ճանաչելու նպատակով։ Գործընթացն այժմ գտնվում է դատարանում։

Հրազդանի համայնքապետարանի աշխատակազմի քարտուղար Ռոբերտ Դանիելյանը «Հետք»-ի հետ զրույցում ասաց, որ համայնքի հայցը բավարարվելու դեպքում, իր կարծիքով, հողերը նորից կվերադարձվեն անտառային ֆոնդին։ «Մենք պահանջում ենք դատարանից անվավեր ճանաչել աճուրդները և դրա հետևանքով կատարված բոլոր պետական գրանցումները ճանաչել անվավեր։ Հայցը բավարարելու դեպքում հողերը վերադարձվելու են համայնքին։ Իմ կարծիքով՝ դրանից հետո համայնքը դիմել է, որ հողերը նորից անցնեն անտառային ֆոնդին, հողերի կատեգորիան փոխվի և այլն»,- ասաց Ռոբերտ Դանիելյանը։