Խորհրդարանն առաջին ընթերցմամբ ընդունեց Ազգային ժողովի պատգամավորներ Սիսակ Գաբրիելյանի և Սիփան Փաշինյանի հեղինակած «Սահմանամերձ համայնքների սոցիալական աջակցության մասին» օրենքում փոփոխություն և լրացումներ կատարելու օրենսդրական առաջարկը: Այն ընդունվեց միաձայն՝ 109 կողմ ձայնով:

Ըստ նախագծի՝ մի շարք արտոնությունների տրամադրման ժամկետը կերկարաձգվի ևս երեք տարով, ինչպես նաև նոր արտոնություններ կտրամադրվեն, ինչպես` ընտանիքում երկու և ավելի աշակերտ ունենալու դեպքում՝ դպրոցական դասագրքերի գումարը մասնակի կամ ամբողջական փոխհատուցելու է Կառավարությունը: Նախագիծը ներկայացրեց Սիսակ Գաբրիելյանը:

Հիշեցնենք, որ գործող օրենքով սահմանապահ համայնքների բնական գազի, սպառած էլեկտրաէներգիայի, ոռոգման ջրի ծախսերի հիսուն տոկոսը փոխհատուցում է Կառավարությունը: Առաջարկվում է նաև այլ արտոնություններ ներառել` այդ թվում հողի գույքահարկի և հողի հարկի ամբողջական փոխհատուցում:

Ադրբեջանի Հանրապետության տարածքից իրականացված ռազմական կամ ահաբեկչական գործողությունների հետևանքով սպանված գյուղատնտեսական և/կամ այլ մթերատու կենդանիների դիմաց տրվելու է փոխհատուցում պետական բյուջեի միջոցների հաշվին: Իսկ եթե նույն գործողությունների հետևանքով սահմանամերձ համայնքների բնակիչներն առաջին, երկրորդ կամ երրորդ խմբի հաշվանդամություն ձեռք բերեն, տրամադրվելու է միանվագ գումարային հատուցում` համապատասխանաբար 3 միլիոն, 2 միլիոն և 1 միլիոն դրամ:

Զոհված քաղաքացիների ընտանիքին տրամադրվելու է միանվագ գումարային հատուցում` 5 միլիոն դրամ: Պետական բյուջեի միջոցների հաշվին է իրականացվելու նաև վնասված կացարանի ծախսերը: Նախագիծը քննարկվելու է նաև երկրորդ ընթերցմամբ:

Լուսանկարում՝ Ադրբեջանի հրետակոծություններից վնասված բնակչի տունը (Տավուշ):