«ՀԱՅ ՖԵՍՏ» 18-րդ միջազգային թատերական փառատոնի այս տարվա կարգախոսն է՝ «Լինե´լ․ սա խնդիր չէ» (“To BE! That's not a question!”).

Փառատոնի մամուլի ծառայության հաղորդագրության համաձայն՝ համավարակի պայմաններում 18-րդ «ՀԱՅ ՖԵՍՏ»-ը կկայանա հոկտեմբերի 1-8-ը՝ նոր ձևաչափով և նոր լուծումներով։ Առաջին անգամ փառատոնը կանցկացվի ոչ միայն Երևանում, այլև Գյումրիում, Վանաձորում և Դիլիջանում։

Փառատոնը կներկայանա երեք հիմնական ծրագրով:

«ՀԱՅ ՖԵՍՏ»-ի գլխավոր անակնկալը կլինի այն, որ փառատոնը կհյուրընկալվի երևանյան տարբեր թաղամասեր․ «ՀԱՅ ՖԵՍՏԸ գալիս է ձեր տուն» խորագրով։ Նախատեսված են ներկայացում-ցուցադրություններ, որոնք տեսապատկերի միջոցով կարտացոլվեն բնակելի շենքերի պատերին, ինչը հնարավորություն կտա առանց տանից դուրս գալու (սեփական պատշգամբից) հետևել ներկայացումների ընթացքին։ Փառատոնի կազմակերպիչները հաշվի են առել հակահամաճարակային անվտանգության բոլոր կանոնները։

Փառատոնի առցանց հարթակներով կցուցադրվեն 5 աշխարհահռչակ ներկայացումներ․ ձեռք է բերվել մեկանգամյա ցուցադրության իրավունք։

Փառատոնի շրջանակում անցկացվելու է թատերական մեծ համաժողով՝ «Ժամանակակից թատրոնը նոր մարտահրավերների առջև» թեմայով, որը կամուրջ կստեղծի աշխարհի տարբեր երկրներում գտնվող ճանաչված թատերական փառատոների տնօրենների, բեմադրիչների, թատերագետների միջև:

Կանցկացվեն նաև վարպետության դասեր։

Այս տարի «ՀԱՅ ՖԵՍՏ»-ը հյուրընկալելու է IETM կատարողական արվեստի միջազգային ցանցի առցանց հանդիպումը։ Այս հանդիպումը նախատեսվում էր լինել Հայաստանում, բայց COVID- 19-ի պատճառով կլինի առցանց։

«ՀԱՅ ՖԵՍՏ» միջազգային թատերական փառատոնն անց է կացվում ԿԳՄՍ նախարարության աջակցությամբ:

2019-2020թթ. Եվրոպական Փառատոների Ասոցիացիան 715 եվրոպական փառատոներից «ՀԱՅ ՖԵՍՏ» միջազգային թատերական փառատոնն ընտրել և ընդգրկել է 24 լավագույնների ցանկում: