Քննարկվում է առաջնագծին և Արցախի բնակչությանը օգնելու նախաձեռնությունները մեկտեղելու հարցը
Սոցիալական ցանցերով մի շարք օգտատերեր և խմբեր երեկվանից նախաձեռնություններ են սկսել՝ առաջնագիծ և Արցախի բնակչությանը առաջին անհրաժեշտության պարագաներ ուղարկելու համար։
Հիմնականում հավաքվում են չփչացող սնունդ, ծխախոտ, հիգենիայի պարագաներ, դեղորայք, երեխաների հագուստ։
Հանրապետության մետրոյի հարակից զբոսայգում երեկվանից հավաքում են վերոնշյալ պարագաները:
Նախաձեռնության հեղինակները որոշել են հավաքված պարագաներն այսօր երեկոյան փոխանցել Պաշտպանության նախարարություն։
Այսօր երեկոյան 18:30-19:30 Երիտասարդական մետրոյի մոտ հագուստ են հավաքելու ապաստարաններում գտնվող երեխաների համար։
Վարչապետի մամուլի քարտուղար Մանե Գևորգյանը «Հետքին» հայտնեց, որ այժմ Կառավարությունում քննարկվում է ստացված օգնությունները, ինքաբուխ նախաձեռնությունները մեկտեղելու, համակարգելու եւ բաշխելու գործընթացը։
«Մենք ենք, մեր սահմանները. բոլորս Արցախի համար» խորագրով համազգային դրամահավաք-արշավ է սկսել նաև Հայաստան համահայկական Հիմնադրամը։
Մի շարք քաղաքացիներ երեկվանից հայտարարում են, որ իրենց բնակարաններում կարող են հյուրընկալել Արցախի բնակիչներին։
Աշխատանքի և սոցիալական հարցերի նախարար Զարուհի Բաթոյանը գրառում է կատարել՝ նշելով, որ պետական մարմիններն ի վիճակի են զբաղվել կացարանների հարցով, եթե դրա անհրաժեշտությունը լինի:
Աշխատանքի եւ սոցիալական հարցերի նախարարի մամուլի քարտուղար Սոնա Մարտիրոսյանը «Հետքին» հայտնեց, որ իրենք քաղաքացիների հավաքած սնունդը պահեստավորելու և փոխանցելու լիազորություններ չունեն։
Սակայն, եթե բնակչության մասնակի կամ ամբողջական տարհանման որոշում լինի, նախարարությունը կարող է տարհանված անձանց տեղավորի մանկատներում և ծերանոցներում։
Լուսանկարները՝ Անի Սարգսյանի
Մեկնաբանել