Ամերիկայի հայկական համագումարի տարածաշրջանային տնօրեն Արմինա Դարբինյանի մեկնաբանությունը ԱՄՆ Սենատ ներկայացված Հայոց ցեղասպանության նոր բանաձևի շուրջ.

 

Ինձ համար Ամերիկայի Միացյալ Նահանգների Կոնգրեսում Հայոց ցեղասպանության ճանաչման պարբերաբար կրկնվող գործընթացը պայքար է շահի և բարոյականության միջև:

 

Այն նախագահը, որի օրոգ ճշմարտությունը կհաղթանակի, իրավունք կունենա կրել ամենաժողովրդավարական երկրի արդար ընտրված նախագահի բարձր տիտղոսը:

 

Չափազանց կարևոր է, որ հարցը դիտարկվի ոչ թե նեղ ազգային տեսանկյունից, այլ համամարդկային արժեքների համատեքստում, ինչը, կարծես, այս անգամ, ի տարբերություն նախորդ 252 Ներկայացուցիչների Պալատի բանաձևի, ընդգծված է. «հռոմեացիների կողմից քրիստոնյաների հալածումը, թուրքերի կողմից հայերի ջարդերը, նացիստների կողմից միլիոնավոր հրեաների ու լեհերի ոչնչացումը ցեղասպանություն հանցագործության ակնառու օրինակներ են»:

 

Եթե նույնիսկ քննարկումներին հետևեն թուրքական պաշտոնյաների ծայրահեղ հիստերիկ արձագանքները, կամ պետքարտուղարության զգույշ և անսկզբունքային, ընդգծված դիվանագիտական ձևակերպումները, կամ Միացյալ Նահանգների Նախագահի տարօրինակ հիշողության խանգարումները ավանդական ապրիլքսանչորսյան ուղերձում` արդարությունը միևնույն է հաղթանակելու է, դա զուտ ժամանակի հարց է:

 

Հարգանքի է արժանի կոնգրեսականների հետևողական գործելաոճը, որը վկայում է խնդրի կարևորության և արդիականության մասին:

 

Իսկ ինչ վերաբերում է Ամերիկայի հայկական համագումարին, ապա մենք տասնամյակներով ապացուցված մեզ բնորոշ հետևողականությամբ,  օգտագործելով վողջ փորձն ու ներուժը, առավել եռանդով շարունակելու ենք մեր ազգանվեր գործունեությունը Հայոց ցեղասպանության միջազգային ճանաչման և ժխտողական տրամադրություններն արմատախիլ անելու ուղղությամբ: