Տեսանյութեր
Լուսանկարներ
Լարիսա Ալավերդյանը բղավում էր, իսկ Սամվել Նիկոյանը հետ չէր մնում նրանից
Չորրորդ գումարման Ազգային ժողովի 11-րդ նստաշրջանի ԱԺ-կառավարություն հարցուպատասխանի վերջին նիստն առանց ինտրիգների չանցավ:
«Ժառանգություն» խմբակցության քարտուղար Լարիսա Ալավերդյանը, դիմելով կառավարությանը, հետաքրքրվեց, թե արդյոք չեն պատրաստվում հետ կանչել այսօր ընդունված «Արտակարգ դրության իրավական ռեժիմի մասին» օրինագիծը եւ չեն ընդունում, որ օրինագիծն անցել է խայտառակ քվեարկությամբ, քանի որ դահլիճում քվորում չի եղել:
ԱԺ նախագահ Սամվել Նիկոյանը նախ ընդհատեց Լարիսա Ալավերդյանի ելույթը, հետո հորդորեց անջատել պատգամավորի խոսափողը, քանի որ Լ. Ալավերդյանն, ըստ Սամվել Նիկոյանի, կառավարության հետ կապ չունեցող հարց է բարձրացնում:
Լարիսա Ալավերդյանը բացատրեց, որ, խոսելով քվորումի բացակայության պայմաններում ընդունված օրինագծի մասին, ինքը պարզապես ներկայացնում է իրավիճակը, եւ իրավունք չունեն իրեն ընդհատելու: Այնուհետեւ, Սամվել Նիկոյանը թույլ տվեց, որ պատգամավորը շարունակի իր հարցը:
Հարցին պատասխանեց արդարադատության նախարար Հրայր Թովմասյանը եւ ասաց, որ օրինագիծը հետ չի տարվի: Լարիսա Ալավերդյանը, հավանաբար նկատի ունենալով Սամվել Նիկոյանին եւ որոշ ՀՀԿ-ական պատգամավորների, նշեց, թե դահլիճում առկա ջղաձգությունը պետք է ուղղել ոչ թե իր դեմ, այլ այն պատգամավորների, ովքեր նախագծի երրորդ ընթերցմանը չկարողացան պատվով քվեարկել:
Լարիսա Ալավերդյանը, նախարարի պատասխանից չգոհանալով, չէր հեռանում 3-րդ խոսափողի մոտից: Թեեւ այն անջատված էր, սակայն նա շարունակում էր իր միտքը, իսկ Սամվել Նիկոյանն էլ տեղից անդադար բղավում էր, որ հարց տալու հերթը Անահիտ Բախշյանին է: «Տիկին Ալավերդյան, Ձեր խոսելու մարմաջը չեք կարող բավարարել, չորրորդ գումարման ԱԺ-ի ժամանակն ավարտվում է: Նիստից հետո որքան ցանկանաք, թույլ կտանք, որ խոսեք, իսկ հիմա Անահիտ Բախշյանի հարց տալու հերթն է»,- բղավում էր Ս. Նիկոյանը եւ խրատում Լարիսա Ալավերդյանին, ասելով, որ մեծ կին է ու իրեն անկարգ է պահում:
Լարիսա Ալավերդյանը խոսափողի մոտից հեռացավ միայն այն ժամանակ, երբ ավարտեց իր միտքը:
Մեկնաբանություններ (5)
Մեկնաբանել