Ռուսաստանի Պետդուման սեպտեմբերի 29-ին կայացած նիստի ժամանակ ընդունել է հայտարարություն՝ արցախա-ադրբեջանական սահմանագծին առկա իրավիճակի վերաբերյալ, որտեղ ռուս խորհրդարանականները կողմերին կոչ են անում վերադառնալ բանակցությունների և պատրաստակամություն հայտնում միջնորդել իրավիճակի կայունացմանը։

«Պետդուման հայտարարում է կրակի անհապաղ դադարեցման, տարածաշրջանում հակամարտության սրման անթույլատրելիության և իրավիճակի խաղաղ կարգավորմանը այլընտրանք չլինելու մասին։ Պետդումայի պատգամավորները կոչ են անում կողմերին անհապաղ վերադառնալ բանակցային գործընթացին և պատրաստ են ցուցաբերել միջնորդական օժանդակություն՝ իրավիճակի կայունացման համար»,- նշվում է հայտարարության մեջ։

Հայտարարության մեջ պատգամավորները նաև իրենց մտահոգությունն են արտահայտում արցախա-ադրբեջանական զորքերի շփման գոտում իրավիճակի կտրուկ սրման վերաբերյալ, որը հանգեցրել է մարդկային զոհերի։

Պետդուման այս հայտարարությունը կուղարկի ՌԴ նախագահին, կառավարությանը, Հայաստանի և Ադրբեջանի խորհրդարաններին, ԵԱՀԿ Մինսկի խմբի համանախագահներին, Միջխորհրդարանական միությանը, ՀԱՊԿ խորհրդարանական վեհաժողովին, ԱՊՀ երկրների միջխորհրդարանական վեհաժողովին, ԵԽԽՎ-ին և ԵԱՀԿ խորհրդարանական վեհաժողովին։

Լուսանկարը՝ Сергей Савостьянов / ТАСС