HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Խորհրդարանը քննարկեց 2020 թվականի ընթացիկ ծախսերն ավելացնելու նախագիծը

Խորհրդարանի արտահերթ նիստում առաջին ընթերցմամբ քննարկվեց Կառավարության ներկայացրած «2020 թվականի պետական բյուջեի մասին» օրենքում փոփոխություն կատարելու նախագիծը:  Նախագծի հիմնական զեկուցող, Ֆինանսների նախարար Ատոմ Ջանջուղազյանի խոսքով` ռազմական դրության իրավական ռեժիմով պայմանավորված՝ Կառավարությունը ներկայացնում է ընթացիկ տարվա բյուջեի փոփոխության նախագիծ:

«Այս նախագիծը նաև տարբերվում է իր հիմքում ընկած կանխատեսումներով: Այդ տրամաբանությամբ` 2021 թվականի բյուջեի նախագիծը քննարկելիս անհրաժեշտություն կունենանք անդրադառնալ 2020-ին սպասվող զարգացումներին»,- ասաց նախարարը:

Ըստ նախագծի` 2020-ին սպասվում է 6.8 % տնտեսական անկում` ապրիլին բյուջեի օրենքի փոփոխությունների հիմքում ընկած 2 % անկման փոխարեն: Իսկ անվանական ՀՆԱ-ն կնվազի՝ կազմելով 6170,2 մլրդ դրամ` ապրիլին բյուջեի հիմքում ընկած 6485 մլրդ դրամի փոխարեն: Ըստ Ֆինանսների նախարարության հաշվարկների` սպասվում է հարկային եկամուտների նվազում մոտ 35 մլրդ դրամով:

Ռազմական գործողություններով պայմանավորված՝ սպասվում է ընթացիկ ծախսերի աճ՝ մոտ 40 մլրդ դրամի չափով:

Նախագծի հարակից զեկուցող, ԱԺ ֆինանսավարկային և բյուջետային հարցերի մշտական հանձնաժողովի նախագահ Արկադի Խաչատրյանի խոսքով` ծախսերն ավելացվելու են, դեֆիցիտը մեծանալու է, Կառավարության պարտքը կարող է հասնել համախառն ներքին արդյունքի (ՀՆԱ) 67 %-ը:

«Շատերը հարցնում են, թե սրանք ինչ թվեր են, և ինչ հետևանքներ կարող են ունենալ: Պետք է նշել, որ այս պահին Հայաստանի համար մեկ առաջնահերթ խնդիր կա` Հայաստանի ու Արցախի անվտանգության ապահովումը: Հետևաբար ներկայացնելով այս նախագիծը` Կառավարությունը հայցում է խորհրդարանի թույլտվությունը` կատարելու անհրաժեշտ վերաբաշխումներ, ավելացնելու ծախսերը և ներգրավելու լրացուցիչ գումարներ, եթե կարիքը լինի»,- ասաց Խաչատրյանը` կոչ անելով կողմ քվեարկել նախագծին: Նախագծի քննարկումներն ավարտվեցին:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter