Երեկ՝ ժամը 14:31-ին, «1-03» ծառայությունից արտակարգ իրավիճակների նախարարությունում տեղեկություն է ստացվել, որ փլուզվել է Գյումրիի Ղանդիլյան 10 շենքի 2-րդ բնակարանի պատշգամբը: Դրա հետևանքով նույն բնակարանի բնակչուհի` 1959 թ. ծնված Կարինե Խոջոյանը վայր է ընկել և, ստանալով տարբեր մարմնական վնասվածքներ՝ տեղափոխվել Գյուլբենկյանի անվան հիվանդանոց:

Դեպքի վայր է մեկնել Շիրակի մարզային փրկարարական վարչության օպերատիվ խումբը:

Դեռևս չբացահայտված հանգամանքներում մասնակի փլուզվել է նշված բնակարանի պատշգամբի հարթակը: Դեպքի մասին տեղյակ է պահվել Գյումրիի քաղաքապետարանի կոմունալ բաժինը:

«Ըստ բժիշկների` տուժածի առողջական վիճակը բավարար է»,- տեղեկացնում է Արտակարգ ալիք լրատվական կենտրոնը: