Առողջապահության նախարարությունն այսօր հայտնեց, որ խոշորացված Տաշիր համայնքի Կաթնառատ բնակավայրում ջրից թունավորման հետեւանքով վարակիչ հիվանդության դեպքեր են գրանցվել։

Քաղաքացիները հիվանդանոցներ են դիմել հոկտեմբերի 6-ին։

Լոռու մարզպետարանի աշխատակազմի առողջապահության եւ սոցիալական ապահովության վարչության պետի ժամանակավոր պաշտոնակատար Լուսինե Վարդանյանը «Հետքի» հետ զրույցում հայտնեց, որ այժմ Ստեփանավանի հիվանդանոցում հոսպիտալացված է 25, իսկ Վանաձորի ինֆեկցիոն հիվանդանոցում՝ 10 հիվանդ։ Նրանց առողջական վիճակը գնահատվում է բավարար՝ միջին ծանրության։

Լուսինե Վարդանյանի փոխանցմամբ՝ Հիվանդությունների վերահսկման և կանխարգելման ազգային կենտրոնը (ՀՎԿԱԿ) կատարել է լաբորատոր հետազոտություններ, իրականացվել են  համաճարակաբանական բոլոր տեսակի հետազոտական աշխատանքներ։ Այս պահին էլ մարզի գլխավոր համաճարակաբանը և ՀՎԿԱԿ-ի տնօրենը դեպքի վայրում են, որպեսզի հստակ պարզեն ջրի աղբյուրը։

Մանրէաբանական հետազոտության նպատակով նմուշներ են վերցվել ինչպես բուժառուներից, այնպես էլ մակերեսային աղբյուրի ջրից:

Լուսինե Վարդանյանի խոսքով՝ վերջին երկու տարիներին մարզում թունավորման նման զանգվածային դեպք չէր գրանցվել։

Տաշիրի համայնքապետ Էդգար Արշակյանը հրաժարվեց որևէ տեղեկություն հաղորդել թունավորման դեպքի և բնակավայրում խմելու ջրի մատակարարման վիճակի մասին։

Լուսանկարում՝ Տաշիր քաղաքային համայնքը