«Ձեր զինվորի անունը չկա ո'չ վիրավորների, ո'չ էլ զոհերի ցուցակում»,- այս խոսքերը լսելու հույսով են առաջնագծում գտնվող զինծառայողների հարազատները օրական մի քանի անգամ զանգում Պաշտպանության նախարարության թեժ գիծ՝ 1-28 համարով։

Քանի որ թեժ գծի՝ զոհերի և վիրավորների վերաբերյալ ցանկն ամենահաճախն է թարմացվում, որոշ դեպքերում զանգերին պատասխանող ՊՆ աշխատակիցներն առաջինն են հայտնում հարազատին՝ զինվորի զոհված կամ վիրավորված լինելու մասին։

Սեպտեմբերի 27-ից թեժ գիծն աշխատում է շուրջօրյա, քանի որ օրական ավելի քան 3000 զանգ են ստանում։ 9 օր շարունակ, օրը 24 ժամ, անդադար զանգերի ու սենյակում ծանրացած լռության մեջ հնչում են վիրավոր և, ցավոք, նաև զոհված զինծառայողների անուններ։

Ըստ ՊՆ մարդու իրավունքների և բարեվարքության կենտրոնի պետ Գևորգ Մարտիրոսյանի՝ զանգողների 55%-ը հարցնում է, թե արդյոք իր զինծառայողի անունն առկա է վիրավորների կամ զոհերի ցանկում, 30%-ը ցանկանում է իմանալ, թե ինչ նյութական աջակցություն կարող է ցուցաբերել բանակին, 10%-ը հարցնում է կամավորագրման կարգի վերաբերյալ, իսկ 5%-ը ցանկանում է մամուլում շրջանառվող լուրերը ճշգրտել։  

Կարինե Մանուկյան, Սուսինա Խաչատրյան
Հետք Մեդիա Գործարան