Երեկ Լոս Անջելեսում 150 000-ից ավելի հայեր բողոքի ակցիա են իրականացրել՝ ընդդեմ Արցախի նկատմամբ ադրբեջանա-թուրքական ագրեսիայի:

Վերջին տարիներին սա Լոս Անջելեսում հայերի կազմակերպած ամենամարդաշատ բողոքի ակցիան էր՝ Հայոց Ցեղասպանության 100-ամյակին նվիրված քայլերթից հետո։

Արցախի անկախությունը ճանաչելու, Թուրքիային ՆԱՏՕ-ի կազմից հանելու, Թուրքիայի՝ Արցախի նկատմամբ ագրեսիան դատապարտելու պահանջներով հայերը քայլերթով շարժվել են դեպի Թուրքիայի հյուպատոսության շենք։ 

Թուրքիայի հյուպատոսության շենքի վրա պատկերվել է Արցախի դրոշը՝ «Խաղաղություն Հայաստանին» (#PeaceforAmenia) գրությամբ։ 

Բողոքի ակցիային ներկա են եղել նաև ամերիկացի բարձրաստիճան պաշտոնյաներ։ Նրանք իրենց աջակցությունն են հայտնել հայերին, Արցախին։ 

Բողոքի ակցիայի ընթացքում Թուրքիային դատապարտող և Արցախին աջակցելու կոչերով ելույթ են ունեցել նաև ԱՄՆ Կոնգրեսմեն Ադամ Շիֆը և Լոս Անջելեսի քաղաքային խորհրդի անդամ Փոլ Գրիգորյանը։ Ադամ Շիֆը քիչ առաջ նաև Ֆեյսբուք սոցիալական ցանցի իր էջում է գրառում կատարել՝ նշելով, որ այսօր իր համար պատիվ էր գտնվել Հաղթանակի քայլերթին (#MarchforVictory)՝ դատապարտելով թուրքերի և ադրբեջանցիների ագրեսիան ընդդեմ Արցախի և Հայաստանի։

Բողոքի ակցիան տևել է 3 ժամ։