Այսօր` առավոտվա ժամը 5-ից, հայերը և եզդիները փակել էին Գերմանիայի Համբուրգ քաղաք մտնող գլխավոր ճանապարհները՝ պահանջելով, որ Գերմանիան ճանաչի Արցախի անկախությունը եւ դադարեցնի զենքի վաճառքը Թուրքիային։ 

Վաղ առավոտից եվրոպական մի շարք երկրներում հայերը բողոքի ակցիա են իրականացնում՝ ընդդեմ ադրջեբանական եւ թուրքական ագրեսիայի։ 

Համբուրգում բողոքի ակցիային միացածներից Սպարտակ Հովհաննիսյանը «Հետքի» հետ զրույցում նշեց, որ ժամը 5-ից մինչեւ 9-ը քաղաքի գլխավոր ճանապարհները երկկողմանի փակ են եղել, որն առաջացրել էր մի քանի կիլոմետրի հասնող խցանում։ Վերջինիս խոսքով՝ նպատակն էր նաեւ, որ միջազգային մեդիան արձագանքեր Հայաստանում եւ Արցախում տեղի ունեցող ռազմական գործողություններին, խաղաղ բնակչության հրետակոծմանը։

«Հիմա մի շարք թերթերով, ռադիոյով, հեռուստատեսությամբ անդրադառնում են», - հավելեց Սպարտակ Հովհաննիսյանը։ 

Հավաքված հայերի եւ եզդիների կոչերը նույնն են՝ «Արցախը Հայաստանն է», «Հաղթելու ենք», «Էրդողան, Ալիեւ տեռորիստ» եւ այլն։