Արցախա-ադրբեջանական պատերազմի ընթացքում Հայաստանի Հանրապետության Գեղարքունիքի մարզում խոցվել է 18 ԱԹՍ։ Դրանք խոցվել են ոչ միայն Վարդենիսի, այլև Մարտունու և Գավառի տարածաշրջաններում։ Այս մասին մամուլի ասուլիսի ժամանակ հայտնեց Գեղարքունիքի մարզպետ Գնել Սանոսյանը։

«Թշնամին ԱԹՍ-ներով փորձում է իրականացնել հրթիռակոծման աշխատանքներ, ինչի հետևանքով Մեծ Մասրիկում ունեցանք զոհ, 2 վիրավոր, և վերջերս հերթական նման խոցման հետևանքով վիրավորվեց 14-ամյա Նարեկը»,- նշեց մարզպետը։

Ըստ Գնել Սանոսյանի՝ մարզում վնասվել է շուրջ 40 առանձնատուն, 2 դպրոց՝ Կութ և Սոթք համայնքներում, իսկ Մեծ Մասրիկում խոցման հետևանքով ոչ միայն ամբողջովին տուն է փլուզվել, այլև հարակից գազատարն է վնասվել, ինչի հետևանքով հրդեհ էր բռնկվել։

Գեղարքունիքի մարզպետի խոսքով՝ դաշտային բազմաթիվ տարածքներում կան հրետակոծություններ, որոնց պատճառով գյուղատնտեսական աշխատանքների իրականացնելու խնդիր է առաջանում։

Վերջինս իր խոսքը եզրափակեց՝ ներկայացնելով մարզի բնակչի Գևորգի պատմությունը․

«Գևորգը ձեռքը գրպանը Սևանի զինկոմիսարիատից հասել է մինչև ռազմաճակատ։ Ինչո՞ւ ձեռքը գրպանը։ Գևորգի մեկ ձեռքը չկա, մատները կտրված են դաստակից, և Գևորգը զիինկոմիսարիատում թաքցրել է այդ փաստը՝ ձեռքը գրպանը պահելով։ Այս պահին նա ռազմաճակատում է, առաջին գծում մեր տղաների կողքին։ Մեզ հաղթել հնարավոր չէ, ու մենք անպայման հաղթելու ենք»։