Մարտի 24-ին Շահումյանի հրապարակում ՀՀ նախագահ Սերժ Սարգսյանի ներկայությամբ տեղի ունեցավ «Հայփոստ»-ի նոր մեքենաների ցուցադրումը:

«Հայփոստը» թվով 25 փոխադրամիջոցներով (կորեական «Daewoo», գերմանական «Volkswagen» և ճապոնական «Mitsubishi» մեքենաներ) համալրեց իր ավտոտնտեսությունը, որի շնորհիվ մասամբ կփոխարինվեն հին ավտոմեքենաները և  գլխավորապես կավելանան Երևանի և Արագածոտնի մարզի երթուղիները 50 տոկոսով: Մնացյալ մարզերի երթուղիների քանակը կավելացվի համաձայն  Հայփոստի 2012 – 2016թթ Մաստեր պլանի:

Նոր ավտոտրանսպորտային միջոցները բնապահպանական   ավելի բարձր պահանջներ են ապահովում և կնպաստեն կրճատել գործառնական ծախսերը` բարձրացնելով փոստային կապի սպասարկման որակը:

«Հայփոստ» ՓԲԸ-ի հավատարմագրային կառավարիչ Խուան Պաբլո Գեչիջյանը և «Հայփոստ» ՓԲԸ գլխավոր տնօրենի պաշտոնակատար Հայկ Ավագյանը նախագահ  Սարգսյանին ներկայացրին «Հայփոստ»-ում իրականացվող բարեփոխումները, այդ թվում՝ փոստային կապն ազգաբնակչությանն առավել մատչելի դարձնելու նպատակով իրականացվող աշխատանքները:

Այդ նպատակով Հայփոստը վերաձևավորվում է բազմաֆունկցիոնալ պրոցեսինգային օպերատորի, որը կլինի առավել դինամիկ և ճկուն:

Մասնավորապես, առաջին հինգ տարիների ընթացքում ներդնելով մոտ 25,000,000 ԱՄՆ դոլար, նախատեսվում է` 

• արդիականացնել 300 փոստային մասնաճյուղեր և բաժանմունքներ: Արդիականացումը ներառում է փոստային բաժանմունքների վերանորոգում, կահավորում և ժամանակակից տեխնոլոգիաների և սարքավորումների ներդնում, առցանց միացում գլխամասին, 
• կիրառել նորարարական ծրագրեր հիմանական և սպասարկման գրասենյակներում,
• կատարելագործել գլխամասի և փոտային բաժանմունքների միջև առկա ցանցը,
• օպտիմալացնել գործառնական ընթացակարգերը և փոստային ցանցը,
• վերակազմավորել և որակապես վերապատրաստել մարդկային ռեսուրսները,
• նորացնել և թարմացնել տրանսպորտային միջոցները,
• մշակել և կիրառել նոր ժամանակակից պրոդուկտներ և ծառայություններ: 

Հայփոստի ենթակառուցվածքների արդիականացման առաջիկա լայնածավալ ներդրումների իրականացման համար Հայաստանի Հանրապետության կառավարությունը և հավատարմագրային կառավարիչը  ձևավորում են «Հայփոստի» կառավարման նոր մոդել, որը հիմնված է արդիականացման Մաստեր պլանի վրա:

Պայմանագրի գործողության ժամանակահատվածում կառավարման նոր մոդելի ներդրումը կկազմի մոտ 100 մլն. ԱՄՆ դոլար:

«Հայփոստը» ՓԲԸ մամուլի և հասարակայնության հետ կապերի ծառայություն