Իրանն ԱԹՍ-ների ներգրավմամբ զորավարժություններ է անում Հայաստանի և Ադրբեջանի սահմանին
Իրանի ցամաքային զորքերը կիրակի՝ հոկտեմբերի 25-ին, զորավարժություն են սկսել երկրի հյուսիսարևմտյան սահմանին։ Այդ մասին հայտնում է իրանական Tasnim գործակալությունը։
Հայաստանի և Ադրբեջանի սահմանին տեղակայվել է Իրանի ցամաքային զորքերի հետևակային հատուկ բրիգադներից մեկը, ինչպես նաև անօդաչու թռչող սարքեր, հրետանային ստորաբաժանում և զրահատեխնիկա։ Tasnim-ի հաղորդագրության մեջ զորավարժություններն անվանվել են «նախազգուշացում թշնամիների համար»:
Ռուսական ТАСС գործակալությունը նշում է, որ նախօրեին Ադրբեջանի և Հայաստանի սահմանների մոտ Իրանը տեղակայել է զինված ուժերի և Իսլամական հեղափոխության պահապանների կորպուսի մի քանի էլիտար ստորաբաժանումներ։ Հոկտեմբերի 18-ին լրացել է Իրանի նկատմամբ զենքի էմբարգոյի ժամկետը, որի երկարաձգման նախագիծը՝ առաջ քաշված Միացյալ Նահանգների կողմից, ավելի վաղ մերժվել էր ՄԱԿ-ի Անվտանգության խորհրդում։
Էմբարգոյի ժամկետի ավարտից մի քանի օր առաջ Իրանը հայտարարել էր, որ արցախյան հակամարտության գոտուց հրետանային արկերը ընկնում են նաև իր տարածք։ Երկրի ԱԳՆ-ն էլ խոստացել էր ձեռնարկել համապատասխան միջոցներ։
Լուսանկարը՝ IRNA գործակալության
Մեկնաբանել