Կենտրոնական բանկը (ՀՀ ԿԲ) որոշել է այս անգամ  անփոփոխ թողնել վերաֆինանսավորման տոկոսադրույքը, այն է՝ 4.25%: Այս մասին տեղեկանում ենք  գլխավոր դրամատնից, որի խորհուրդն այսօր՝ հոկտեմբերի 27-ին, քննարկել է տոկոսադրույքի վերանայման հարցը:  

Վերաֆինանսավորման տոկոսադրույքն այն տոկոսն է, որով Կենտրոնական բանկը վարկեր է տրամադրում գործող առևտրային բանկերին: Դա օգնում է բանկերին էժան փողի հարցում և որոշ ժամանակ անց կարող է հանգեցնել նրանց կողմից քաղաքացիներին տրամադրվող վարկերի տոկոսադրույքների նվազմանը։ 

Սովորաբար, Կենտրոնական բանկը վերաֆինանսավորման տոկոսադրույքը սահմանում է` գլխավորապես հաշվի առնելով երկրի տնտեսության վիճակն և գնաճի մակարդակը։ Որքան ավելի մեծ է լինում գնաճը, այնքան ավելի բարձր տոկոսադրույք է սահմանվում, և հակառակը։ Այս անգամ ԿԲ-ն դեռևս չի մանրամասնել տոկոսադրույքն անփոփոխ թողնելու հիմքերը: Օրվա երկրորդ կեսին նախատեսված է ԿԲ նախագահ Մարտին Գալստյանի ասուլիսը:

Վերջին անգամ ԿԲ-ն վերաֆինանսավորման տոկոսադրույքը նվազեցրել է այս տարվա սեպտեմբերին՝ 4.5 %-ից դարձնելով 4.25%: Դա այս տարվա ընթացքում չորրորդ անգամն էր, որ ԿԲ-ն իջեցնում էր տոկոսադրույքը: