Արցախի քաղաքացիների համար բժշկասոցիալական վերափորձաքննության ժամկետը երկարացվել է
Աշխատանքի և սոցիալական հարցերի նախարարի տեղակալ Տաթևիկ Ստեփանյանը «Արմենպրես» լրատվական գործակալության մամուլի սրահում այսօր հանդես եկավ մամուլի ասուլիսով: Նախարարի տեղակալը ներկայացրեց նախարարության գործառույթները՝ Արցախից ժամանակավոր Հայաստան տեղափոխված անձանց կեցության հարցերը կարգավորելու մասին:
Տաթևիկ Ստեփանյանն ասաց, որ կարևոր փոփոխություն է կատարվել հաշմանդամության վերափորձաքննության գործընթացում: Ըստ նրա՝ Արցախի Հանրապետության այն քաղաքացիները, ովքեր բժշկասոցիալական փորձաքննություն պետք է անցնեն ապրիլի 15-ից մինչև դեկտեմբերի 1-ն ընկած ժամանակահատվածում, ժամկետը երկարացվել է մինչև 2021 թ. հունվարի 15-ը: Հետևաբար թոշակները, սոցիալական բնույթի այլ նպապաստների վճարումը կկատարվի արդեն իսկ սահմանված չափով՝ հիմնվելով քաղաքացու ունեցած հաշմանդամության խմբի կամ «հաշմանդամ երեխա» կարգավիճակի վրա:
Հոկտեմբեր ամսվանից սկսած վճարվում են նաև Արցախից ժամանակավոր տեղափոխված քաղաքացիների կենսաթոշակներն ու սոցիալական նպաստները: Նշված անձինք անձը հաստատող փաստաթղթով կարող են մոտենալ Հայաստանում «Հայփոստի» բաժանմունք և ստանալ կենսաթոշակը:
Փոփոխությունից մեկն էլ այն էր, որ ՀՀ քաղաքացիները կարող են սոցիալական փաթեթի գումարները փոխանցել «Հայաստան» համահայկական հիմնադրամին:
Մեկնաբանել