Երևանի քաղաքապետը հանդիպել է Արցախի նախագահին
Երևանի քաղաքապետ Հայկ Մարությանը ֆեյսբուք իր էջում տեղեկացրել է, որ այսօր գնդապետ Արթուր Ալեքսանյանի (Ամարասի Արթուրի) հետ Ստեփանակերտում հյուրընկալվել է Արցախի Հանրապետության նախագահ Արայիկ Հարությունյանին։
«Քննարկել ենք ադրբեջանական ագրեսիայի հետևանքով մայրաքաղաք Ստեփանակերտում եղած ավերածությունների շուտափույթ վերականգնման-վերակառուցման աշխատանքների կազմակերպմանը վերաբերող հարցեր: Երևան համայնքը իր բաժին կարևոր մասնակցությունը կունենա Ստեփանակերտի՝ բնականոն կյանքին վերադառնալու հարցում: Իսկ նոյեմբերի 13-ից կանոնավոր կերպով ամեն օր անվճար հիմունքներով Ստեփանակերտ կուղևորվեն մարդատար ավտոբուսներ, որոնք Արցախ կտեղափոխեն բոլոր այն քաղաքացիներին, որոնք պատերազմի պատճառով ժամանակավորապես ապաստանել էին Երևանում կամ ՀՀ մարզերում:
Նախագահի հետ հանդիպումից հետո վերադարձել ենք մեզ վստահված մարտական դիրքեր»,- նշել է Հայկ Մարությանը։
Մեկնաբանել