Մի քանի ընտրատարածքային ընտրական հանձնաժողովներ այսօր նիստ են գումարել եւ քննարկել մեծամասնական ընտրակարգով առաջադրված պատգամավորության թեկնածուների փաստաթղթերը:

Կենտրոնական ընտրական հանձնաժողովից «Հետքին» տեղեկացրին, որ նիստ է գումարվել 5 ընտրատարածքային հանձնաժողովում:

Երեւանի թիվ 3 ընտրատարածքում (Քանաքեռ-Զեյթուն, Նոր Նորք) առաջադրվել է 4 թեկնածու՝ «Ժողովրդավարական ուղի» կուսակցության նախագահ Մանուել Գասպարյանը, ՕԵԿ փոխնախագահ Մհեր Շահգելդյանը, «Քեթրին» բարեգործական ՀԿ-ի նախագահ, ՀՀԿ անդամ Արթուր Ստեփանյանը, ինչպես նաեւ ԲՀԿ-ական պատգամավոր Աշոտ Տոնոյանը: Հանձնաժողովը բոլոր թեկնածուներին էլ գրանցել է:

Նիստ է գումարել նաեւ թիվ 5 ընտրատարածքային հանձնաժողովը (Դավիթաշեն, Արաբկիր): Այստեղ առաջադրվել է 3 թեկնածու՝ Դավթաշենի վարչական շրջանի ղեկավար, ՀՀԿ անդամ Արթուր Գեւորգյանը, ով ոստիկանապետ Վլադիմիր Գասպարյանի փեսան է, Հայաստանի լիբերալ կուսակցության նախագահ Հովհաննես Հովհաննիսյանը եւ անկուսակցական Սուրեն Սիրունյանը: Այստեղ նույնպես բոլոր թեկնածուները գրանցվել են:

Թիվ 8 ընտրատարածքային հանձնաժողովի (Մալաթիա-Սեբաստիա, Շենգավիթ) նիստով գրանցվել են ՀՅԴ կուսակցության անդամ Արթուր Եղիազարյանը, անկուսակցական Վահագն Խաչատուրյանը, ԱԺ ՀՀԿ-ական պատգամավոր Կորյուն Նահապետյանը եւ «Սուրբ Աստվածամայր» ԲԿ-ի պոլիկլինիկայի վարիչ Գագիկ Պետրոսյանը:

Փաստաթղթերի ուսումնասիրությունը հաջող ավարտ է ունեցել նաեւ Շիրակի մարզի թիվ 33 ընտրատարածքում գրանցված թեկնածուների համար: Գրանցվել են առաջադրված 3 թեկնածուներն էլ՝ ԱԺ պատգամավոր, ՀՀԿ անդամ Աշոտ Աղաբաբյանը, «Փոկաս» ՍՊԸ-ի հաշվապահ Շալիկո Զորյանը եւ ՕԵԿ-ական պատգամավոր Հովհաննես Մարգարյանը:

Այսօր նույն մարզի թիվ 36 ընտրատարածքում, որպես պատգամավորության թեկնածու, գրանցվել են «Ժողովրդավարական հայրենիք» կուսակցության անդամ Պետրոս Մակեյանը, ԲՀԿ-ական պատգամավոր Մուշեղ Պետոյանը, Մեղրաշեն համայնքի ղեկավար, ՕԵԿ անդամ Հունան Պետրոսյանը եւ ԱԺ պատգամավոր, ՀՀԿ անդամ Մխիթար Վարագյանը: Նույն ընտրատարածքում ինքնառաջադրված Սուրիկ Գրիգորյանն այսօր ինքնաբացարկ է հայտնել:

ԿԸՀ-ից հայտնեցին, որ հնարավոր է վաղը ընտրատարածքային հանձնաժողովները եւս նիստեր գումարեն եւ քննարկեն առաջադրված թեկնածուների գրանցման հարցը: